Madalena da Costa. imanjen/Osória A.Marques

DILI, 10 agostu 2019 (TATOLI)–Se ita kontinua moris dependénsia ba ema seluk, ita la kriativu iha moris, no  la buka moris ba aan rasik (ukun aan), di’ak liu hola (foti) netik referénsia hosi inan feton defisiénsia Madalena da Costa nia lala’ok moris.

Maske moris ho kondisaun defisiénsia, maibé inan feton ne’ebé koñesidu ho naran Amada nunka hakarak moris dependénsia ba família no ba ema seluk.

Nia gosta aprende no iha vontade maka’as atu moris hanesan ema ne’ebé bele susesu iha karreira. Tanba ne’e, ba Amada, la iha lia fuan “rende” ba “aprende’.

Se mak Madalena da Costa?

Madalena da Costa

Naran Madalena da Costa. Karik seidauk koñesidu iha ema hotu nia futar matan no tilun. No loos duni, públiku seidauk koñese didi’ak Amada ne’ebé moris ho limitasoens fízika, maibé nunka lakon esperansa ba moris.

Amada, moris iha Ainaro 10 Abril 1990, nu’udar oan dalimak hosi maun-alin na’in neen (6) ne’ebé Nai haraik hela ba Reinaldo Gonçalves (aman matebian) ho Laurinda da Costa (inan matebian).

Amada sei ki’ik nia sente moris ne’e la justu no dala ruma fó sala ba nia aan tanba nia moris ho limitasoens fízika. Maibé, bainhira nia idade komesa hakat ba oin hosi tinan ida ba tinan seluk, Amada komesa hatene ona katak, moris ne’e hanesan “grasa” ne’ebé tenke “agradese”.

“Ha’u boot ona no ha’u hanoin katak ida ne’e Maromak nia planu no ha’u tenke simu realidade ne’ebé mak iha,”  hateten Madalena da Costa, bainhira dada lia ho TATOLI iha nia servisu fatin, ONG Ra’es Hadomi Timor Oan (RHTO) iha Taibessi, Dili, foin lalais ne’e.

Ohin, Madalena da Costa, nu’udar ema importante iha RHTO nu’udar  Support Officer. Organizasaun ne’ebé Amada haknaar aan ba ne’e haree liu ba asisténsia no advokasia ba nia kolega maluk defisiente sira seluk.

“Ha’u nia esforsu ne’ebé mak durante ha’u hala’o ne’e sai susesu, maske hetan natoon,  maibé ha’u bele dehan katak ha’u susesu no bele hetan fatin ida mesak ona no ha’u mós bele fó kontribuisaun ba maluk sira ne’ebé mak ami hamutuk no bele sai hanesan motivadora ba maluk defisiénsia sira,” Amada tenik.

Amada, la’ós de’it sofre limitasoens fízika, maibé nia mós moris hanesan oan ki’ak tanba inan-aman mate hotu ona dezde nia sei idade ki’ik. Maun-alin sira seluk, ida-idak haree ninia família uma laran.

Amada, moris mai hosi inan nia knotak ho kedas kondisaun defisiénsia. Inan ho aman simu ho liman rua kondisaun Amada nian tanba sira iha domin boot ba sira na’in rua nia raan basuk.

Iha tempu sei iha foho, Amada nia nesesidade han-hemu la depende ba ema ida. Nia rasik fila-liman ba rai hamoos to’os, fa’i batar, fase roupa no te’in. Karik bele dehan, servisu saida mak feto maluk sira bele halo, Amada mós bele.

Dala uluk, Amada mai Dili hela ho tiun no tian sira iha tinan 2006. Maibé, loron ba loron Amada sente sai fali hanesan todan (beban) ida ba família sira. Ho nune’e, nia deside sai hosi uma família sira nian atu bele senti moris ne’e nia moruk no midar.

Ohin loron, Amada orgullu ho nia potensialidade bele kolabora no servisu iha  RHTO  hodi  ajuda iha parte administrasaun finansa nian no daudaun ne’e mós fó formasaun ba maluk sira kona ba inkluzivu.

Jornalista          : Osória A.Marques

Editór                : Francisco Simões

HAKEREK NO HATÁN

Please enter your comment!
Please enter your name here