MALIANA, 10 agostu 2019 (TATOLI) – Ekipa Karketu Dili FC susesu liki AS Ponta Leste ho rezultadu 2-1, iha jogu kontinuasaun Liga Futeból Amadora (LFA) époka 2019 ne’ebé halao iha Estádiu Munisipál Malibaca Maliana, ohin.

Hosi vitória ne’ebé karketu gãna lori ona ekipa refere haksumik-aan ona hosi zona despromosaun.

Golu vitória Karketu prodúz hosi jogadór Paulo Cotinho (9) iha minutu 33, Rofino Gama (10) 87. Enkuantu golu úniku Ponta Leste hatama hosi José Maria iha minutu 90.

Jogu refere dirije hosi árbitru Pedro Carvalho, juiz liña Filomeno da Silva, Juviano Reis no árbitru rezerva, Elísio Lopez.

Lakon mihis ho Karketu, treinadór Ponta Leste, Eduardo Pereira ba Agência Tatoli ho fuan boot rekoñese nia ekipa falla manán Karketu tanba ladún kontrola oportunidade ho di’ak.

“Jogu ohin kapa’as. Ha’u-nia jogadór sira mak ladún kontrola ho di’ak. Maibé, di’ak. Ida ne’e mak futeból,” tenik Eduardo.

Nia dehan, jogadór Ponta Leste nian barak mentalidade tún bainhira oportunidade di’ak akontese hodi marka penalidade maibé la konsege golu.

“Loloos, ohin, ami bele impata ka manán. Penaltu ida ami hetan maibé Silveiro Garcia labele marka didi’ak entaun la golu. Ho ida ne’e kedas halo ona jogadór barak nia mentalidade tún,” nia haktuir.

Iha fatin hanesan, treinadór Karketu Haryadi Hengkang hateten nia sente kontente ho vitória ne’ebé nia ekipa hetan tanba iha jogu hirak ba kotuk nunka hetan oportunidade nune’e.

“Ohin, ha’u kontente loos. Iha jogu sira ba kotuk ami lakon hela de’it, maibé ohin ami manán ida ne’e manán hodi oin ona,” dehan treinadór ne’e.

Treinadór nasionalidade Indonézia ne’e promete ba oin Karketu sei haksoit dook hosi jona dezpromosaun.

Entretantu, informa mós katak jogu kontinuasaun LFA nian halao mós iha Estádiu Munisipál Dili, ohin lorokraik, entre ekipa Assalam FC kontra Académica FC, iha ne’ebé Assalam konsege manán ho rezultadu 2-1.

Golu ASSALAM hatama hosi Daniel Adade (10) iha minutu 19, 42. Golu Académica FC, hatama hosi Toure Kaba iha minutu74.

Jornista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here