Diretór Jerál SEFOPE, Paulo Alves. Imajen/Egas Cristovão

DILI, 09 agostu 2019 (TATOLI)-Diretór Jerál Sekretáriu Estadu Formasaun Profisionál no Empregu (SEFOPE), Paulo Alves, sente triste tanba iha proposta hamutuk 323 ne’ebé SEFOPE simu hodi fó apoia liuhosi programa auto empregu laiha proposta ida hosi ema ho defisiénsia.

Tanba tuir Diretór Jerál ne’e katak grupu hosi ema ho defisiénsia sira mós iha vontade ne’ebé maka’as no esperiénsia barak iha área negósiu.

“Sente triste tanba laiha grupu defisiente balu maka hatama proposta mai, tanba ami mós iha ami-nia planu asaun anuál, ami hakerek katak pelumenus porsentu 20 ba programa auto empregu ne’e mai hosi grupu ema ho defisiénsia sira tanba sira mós iha hanoin di’ak, kriativu, sira la’ós dependénsia de’it ba Governu, maibé sira buka moris rasik”, Paulo Alves dehan ohin, iha serimónia asinatura akordu entre SEFOPE no grupu auto empregu iha Kaikoli.

Maski nune’e, Diretór Jerál ne’e sei koordena ho tékniku SEFOPE nian katak bainhira iha fali proposta tama no hosi grupu ema ho defisiénsia sira maka sei husu autorizasaun ba Sekretáriu Estadu Julião da Silva para bele apoia.

Paulo Alves fó sasin katak iha tinan 2016, iha grupu defisiénsia balu, sira prodús rasik karreta roda hodi uza.

Notísia relevante : SEFOPE Aloka Rihun $331 Apoia Grupu Auto Empregu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here