Jogadór U-18 ho Asistente Treinadór Muhamad Nico. Imajen espesiál

DILI, 9 agostu 2019 (TATOLI)—Asistente Treinadór Selesaun Nasional U-18, Muhamad Nico hateten maski derrota ho Indonézia, treinadór no jogadór sira hotu mantein liña koordenasaun ne’ebé di’ak hodi hasoru fali jogu tuir mai.

“Biar ita lakon maibé sei iha oportunidade tan ba ita iha jogu tuir mai.  Maibé, hanesan timoroan, ami luta nafatin hodi fó vitória ba ekipa Lafaek,” dehan Nico via telemóvel ba Agência Tatoli, ohin.

Lee mós: Derrota ho Indonézia, TL sei Hasoru Laos no Filipina

Hanesan asistente treinadór, nia iha nafatin konfiansa ba jogadór hotu atu hatudu nasionalizmu hodi lori ekipa refere jogu di’ak liu-tan iha faze tuir mai.

Tanba ne’e, nia husu ba timoroan tomak atu kontinua suporta ekipa Lafaek tanba oportunidade sei iha hodi hakat ba oin.

Fó hanoin fali katak ekipa Timor-Leste seidauk manán selesaun Indonezia dala ida iha jogu Asian Football Federation (AFF) no ida ne’e sai ona hanesan istória ba nasaun rua ne’e, maibé Timor-Leste kontinua luta nafatin hodi harahun istória refere.

Maski lakon hasoru Indonézia, Timor-Leste sei iha oportunidade hodi hasoru tan Laos no Filipina nune’e bele desidi Timor-Leste nia destinu hakat ba meiu finál ka lae.

Tabela klasifikasaun provizória Tasa AFF U-18

  1. Indonézia (pontu 6 ) ( Golu 11-2)
    2. Myanmar (pontu 6) (Golu 7-2)
    3. Timor-Leste (pontu 3) ( Golu 7-6)
    4. Laos (pontu3) (Golu 2-3)
    5. Brunei (pontu zero) (Golu 2-8)
    6. Filipina (pontu zero) ( Gol4 2-11).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here