Serimónia enserramentu formasaun Jornalizmu Báziku iha edifísiu Sekretaria Estadu Juventude no Desportu, ohin. Imajen Tatoli/Xisto Freitas

DILI, 9 agostu 2019 (TATOLI)—Sekretáriu Estadu Juventude no Desportu, Nélio Isaac Sarmento apela ba asesória imprensa sira iha Modalidade Desportu, Sentru Juventude no Comité 12 de Novembro tenke hatene elabora notísia.

Nélio hato’o kestaun ne’e iha edifísiu Sekretaria Estadu Juventude no Desportu (SEJD), Lecidere, ohin, bainhira enserra Treinamentu Jornalizmu Báziku ne’ebé hala’o hosi Info Timor serbisu hamutuk ho Sekretaria Estadu Juventude no Desportu durante semana ida (5-9 agostu 2019).

Partisipante formasaun Jornalizmu Báziku hasai foto hamutuk ho Sekretáriu Estadu Juventude no Desportu, Nélio Isaac Sarmento, Jestór Info Timor, Martinho Gorrety, formadór, funsionáriu no diretór sira SEJD nian iha edifísiu Sekretaria Estadu Juventude no Desportu, ohin. Imajen Tatoli/Xisto Freitas

Nia esplika katak asesória imprensa nia kna’ar sei ajuda promove instituisaun sira ne’ebé temi iha leten liuhusi informasaun.

Tuir Nélio katak elaborasaun informasaun (nótisia) iha kontestu jornalizmu ne’e fásil loos dezde ema ne’e iha vontade atu apriende.

“Buat ida hakerek notísia ne’e lian Indonézia dehan gampang-gampang susah. Importante maka ema ne’e iha vontade apriende, buat hotu-hotu sei sai fásil,” katak governante ne’e.

Iha biban ne’e, Jestór Info Timor, Martinho Gorrety haktuir katak durante formasaun ne’e, partisipante sira apriende kona-ba matéria jornalizmu hanesan oinsá utiliza fórmula hakerek notísia 5W+1H, tékniku kobertura, tékniku entrevista, tékniku opera kamera foto no vídeo.

Hafoin teoria ramata, nia esplika, partisipante ida-idak prátika hakerek notísia depois publika iha blogu ne’ebé treinadór sira ajuda kria hela.

Iha enserramentu ne’e, partisipante hamutuk 17 ne’e simu sertifikadu apresiasaun hosi instituisaun relevante ne’ebé organiza formasaun refere.

Jornalista: Hortençio Sanchez
Editór: Xisto Freitas

HAKEREK NO HATÁN

Please enter your comment!
Please enter your name here