Jerente Nasionál ConocoPhilips iha Timor-Leste (TL), José Lobato Gonçalves. Imajen Tatoli/Egas Cristóvão

DILI, 8 agostu 2019 (TATOLI) – Jerente Nasionál ConocoPhillips iha Timor-Leste, José Lobato Gonçalves, konsidera iha setór petróleu bainhira konsórsiu ida iha diferensa opiniaun ba projetu ida, ne’e buat normál.

“Tanbasá maka CococoPhillips sai hosi konsórsiu Greater Sunrise, normál iha setór petróleu ne’e opiniaun deferente kona-ba oinsá maka atu dezenvolve projetu ida. Entaun, ConocoPhillips iha diferensa hanoin ho parte Governu kona-ba oinsá atu dezenvolve projetu Greater Sunrise”, tenik José Lobato, hafoin ekipa CococoPhillips atualiza lala’ok projetu Bayu-Undan ba Sekretáriu Jerál FRETILI, Marí Alkatiri, iha sede Comité Central FRETILIN (CCF), kinta ne’e.

Nia dehan, kona-ba dezenvolvimentu kampu Greater Sunrise, ConocoPhilips lakohi taka dalan ba Timor-Leste atu atinje objetivu ne’ebé Estadu iha ona.

“Tanba ne’e ita hetan dalan klaran, prontu laiha buat ida. Ami fa’an partisipasaun ne’e ba Estadu Timor-Leste signifika loke dalan ba Estadu hodi hili opsaun saida mak dezenvolve Greater Sunrise, hodi la’o ba oin”, nia dehan tan.

Nia subliña, ne’e normál bainhira iha negósiu petróleu ida, kuandu iha diferensa ideia bele sai hosi projetu hodi fa’an partisipasaun.

“Sertamente ami fa’an partisipasaun iha Greater Sunrise, tanba ne’e kompañia la-involve ona iha Greater Sunrise. Ida ne’e joint venture foun maka sei hala’o no agora projetu Bayu-Undan hanesa projetu dahuluk ne’ebé timoroam aprende iha setór petróleu”, nia akresenta.

Timor-Leste sosa ona partisipasaun ConocoPhillips iha kampu Greater Sunrise ho montante millaun $350, nune’e mós sosa tán asaun Shell ho millaun $300.

Nune’e partisipasaun Timor-Leste iha Greater Sunrise hamutuk pusentu 56,56.

Parseiru atuál sira ba joint venture Greater Sunrise nian maka hanesan Woodside (operadora) ho partisipasaun pursentu 33,4 no Osaka Gas pursentu 10.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here