Jardín Eroi Manatuto "abandonadu". Imajen/Nelson de Sousa

MANATUTO, 09 agostu 2019 (TATOLI)-Iha tinan haat liu ba Governu harii ona Jardín Eroi iha Munisípiu Manatuto, maibé ‘abandonadu’ tanba la uza.

Boaventura Soares

Prezidente Konsellu Kombatente Libertasaun Nasionál Munisipiu Manatuto, Boaventura Soares, hateten, jardín ne’e ninia konstrusaun fízika hanesan uma, moru hale’u no fatin tau restu mortais remata ona, maibé sei falta fatin kee  rai kuak define tuir eskalaun ema ida-idak nian hanesan ho jardín eroi Metinaro nian mak seidauk.

“Ami husu Governu, liuhosi ministériu relevante atu tau atensaun,”  hateten Boaventura Soares, bainhira partisipa komemorasaun loron konsulta populár iha Manatuto, kinta (08/08/2019).

Nia dehan, Konsellu Kombatente Libertasaun Nasionál Manatuto hato’o ona preokupasaun ne’e ba Ministériu Solidariedade, Sosiál no Inkluzaun (MSSI) iha tinan 2017, maibé to’o agora laiha rezultadu.

Munisípiu Manatuto iha komisaun rekollamentu restu mortais iha fatin tolu, hodi rekolla restu mortais saudozu sira nian atu bele halot sira iha fatin dignu.

“Komisaun rekollamentu restu mortais  iha Natarbora  to’o agora rekolla ona restu  mortais 2.000-resin, Manatuto Vila  (68) no Postu Administrativu Laleia  (32) ne’ebé tau provizóriu hela iha  osóariu iha postu administrativu tolu ne’e,” informa Boaventura Soares.

Hatán ba kestaun ne’e, Administradór Munisípiu Manatuto, Fernando de Sousa Junior  hateten, ida ne’e projetu nasionál la’ós kompeténsia munisípiu nian, maibé nia parte sei halo koordenasaun ho governu sentrál halo oinsá mak bele buka solusaun.

“Ami prontu apoiu  oinsá bele koordena ho ministériu relevante hodi bele aselera finalizasaun ba projetu jardín ne’e,” hateten Fernando de Sousa Junior.

 Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here