Prezidente Repúblika, Francisco Guterres Lú Olo akompaña husi Vice Ministru Edukasaun Juventude no Desporto, João Zacarias observa direita kondisaun estudante sira iha Eskola Ensinu Básiku Públiku Ogues-Covalima tuir aprendizajen tuur de’it iha azuleizu leten, kinta (27/06). Imajen/Tatoli/Eugénio Pereira

Kovalima, 09 agostu 2019 (TATOLI)-Reprezentante estudante hosi Eskola Bázika Sentrál (EBC, sigla portugés), ÓGUES, Agostinha Aderita Cardoso, iha suku Ógues, Postu Administrativu Maukatar, Munisípiu Kovalima, hato’o obrigadu barak ba Prezidente Repúblika, Francisco Guteres Lú  Olo, tanba oferese ona karteira hamutuk 130 ba eskola ne’e.

“Ami fó obrigadu barak ba Prezidente Repúblika tanba oferese karteira mai ami iha eskola ne’e, ida ne’e ami sente orgullu tebes”, Agostinha  Cardoso manifesta nia sentimentu orgullu iha ámbitu entrega karteira hosi Palásiu Prezidensiál iha eskola EBC ÓGUES, ohin.

Reprezentante estudante ne’e kompromete katak karteira hirak ne’e sei kuída no uza didi’ak ba prosesu estudu ba tinan naruk.

Estudante ne’e konta katak tinan barak ona “Ami tuur iha rai, tau kadernu iha rai hafoin hakerek matéria ne’ebé fó hosi profesór sira”.

“Uluk, ami sente triste tanba kadeira ho meza laiha maibé ohin ami sente kontente tanba preokupasaun ami nian bele rezolve ona”, katak.

Iha fatin hanesan, estudante terseiru síklu iha EBC ÓGUES, Jerónimo Gusmão, akresenta sente onra tebes tanba Prezidente Repúblika bele apoia diretamente liuhosi entrega kadeira ho meza atu fasilita estudante sira.

“Ami fó obrigadu ba Prezidente Repúblika tanba bele hatán lais ami-nia halerik”, katak.

Notísia relevante : Prezidente Repúblika Entrega Karteira 130 ba EBC ÓGUES

PR Lú Olo Triste Haree Estudante EBP Ogues Tuur iha Rai

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here