Espoza Prezidente Repúblika, Cidália Mouzinho Nobre Guterres, loke odamatan ba uma kbiit laek hodi entrega ofisiálmente ba Rogaia Babo da Silva. Foto Tatoli/Cipriano Colo

TIBAR, 09 agostu 2019 (TATOLI)—Espoza Prezidente Repúblika (PR), Cidália Nobre Mouzinho Guterres, entrega uma no kioske ba família kbiit laek ida ho naran Rogaia Babo da Silva, iha Aldeia Fatunia, Suku Tibar, Postu Administrativu Bazartete, Munisípiu Liquiçá, sesta ne’e.

Rogaia hanesan feto faluk ne’ebé iha oan na’in lima, feto na’in tolu, mane rua, no nia la’en kaben Júlio Saldanha mate iha tinan 2017, bainhira hala’o hela atividade peska iha área tasi ibun Tibar.

Uma ne’e ho medida 6×8 ho gastu orsamentu $3,500 mai husi Gabinete  Conjuge Apoiu Atividade Espoza Prezidente Repúblika, kompañia Heineken iha Timor-Leste, Fórum Comunicação Juventude Oratorio Dom Bosco,  Telkomcel, Asosiasaun Empresário Mulher Timor-Leste ( AEMTL) inklui GMN Holding.

Kioske ne’ebé iha, Heineken  mak oferese  ne’ebé enxe sasán kioske nakonu hanesan sabaun haris,  supermie, masako no seluk-tan, ho objetivu atu tulun família kbiit laek ne’e hodi hatutan moris.

Espoza PR konta tuir, iha tinan kotuk, Gabinete Espoza PR iha programa ida hodi hala’o vizita ba Sentru Lixu Tibar,  hetan labarik barak ho família barak mak moris iha Sentru Lixu refere inklui faluk Rogaia.

Iha altura ne’ebá, Faluk ne’e hasoru malu direta ho Espoza PR no husu atu tau-matan ba ninia kondisaun moris ne’ebé tenke sai mós aman ba oan na’in lima  ho kondisaun uma ne’ebé la favorável.

Hafoin rona tiha preokupasaun ne’e, Espoza PR konsulta kedas ho parte hirak mak mensiona iha leten hodi fó ajuda ba inan faluk ne’e.

Tanba ne’e, Cidália rekoñese katak atividade ne’e susesu tanba serbisu hamutuk entre parte hotu liuhusi apoiu materiál,  finansiál no morál.

Nu’udar inan nasaun haktuir katak sei iha maluk barak mak presiza tulun,  liliu sei iha família barak mak sei moris iha ki’ak nia laran. Tanba ne’e, serbisu ne’e sei la para de’it iha ne’e maibé sei kontinua hala’o iha fatin seluk.

Cidália husu inan faluk ne’e atu uza materiál hirak ne’e hodi bele tau-matan ba labarik sira hodi bele hatutan moris.

Aproveita oportunidade ne’e, Espoza PR hakarak informa ba públiku katak ninia gabinete simu mós proposta barak tebes mai husi komunidade, estudante, grupu no pesoál maibé gabinete nia kbiit ladún barak,  nune’e sei atende ba sira ne’ebé presiza liu.

Iha fatin hanesan, Xefe Suku Tibar, Bento Correia da Conceição agradese ba Espoza PR ne’ebé ajuda ona ninia populasaun liliu família kbiit laek ne’ebé moris ho situasaun faluk no oan na’in lima la eskola. Nia apela ba família ne’e atu uza didi’ak fasilidade ne’ebé iha hodi hatutan moris inklui kioske ne’ebé iha.

Entretantu, Rogaia orgullu no agradese ba Espoza Prezidente Repúblika ne’ebé fó ona apoiu ba nia ho nia oan sira atu bele hatutan moris. Nia promete sei uza didi’ak uma no kioske ne’e hodi bele fasilita mós oan sira ba eskola.

Uma foun ne’e hetan bensaun husi Padre Adriano Ola no asisti direta hosi komunidade Tibar. SukuTibar iha aldeia haat maka hanesan Fatunia, Lihbaulelo, Turliu no Mausoi ho totál populasaun hamutuk 4.804.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here