Prezidente Autoridade Munisípál Dili, Gaspar Soares. Imajen Tatoli/Cipriano Colo

DILI, 9 agostu 2019 (TATOLI)—Autoridade Munisipál Dili (AMD) finaliza ona dezeñu no Built of Quantity (BOQ) uma ho andár haat iha merkadu Taibessi.

“Ita-nia projesaun ba uma ne’e atu akumula vendedór ki’ik-oan sira purvolta rihun haat iha Dili laran,” Prezidente Autoridade Munisipál Dili, Gaspar Soares ba Agência Tatoli iha nia kna’ar fatin, sesta ne’e.

Uma andár refere, nia dehan, sei akumula hotu vendedór ambulante (roda tolu) sira ne’ebé fa’an iha Tais Market Colmera no akumula mós ema sira ne’ebé abandonadu iha lidun sira iha sidade Dili.

Nia mós rekoñese katak durante ne’e seidauk prepara kondisaun ba ema hirak ne’e no seidauk halo tratamentu ho dignu. Durante ne’e mós autoridade uza forsa hodi duni vendedór sira iha dalan ninin, maibé la rezolve problema.

Tuir planu, iha semana ne’e, Prezidente Autoridade Munisipál Dili sei aprezenta planu liliu dezeñu ne’e ba Ministru Administrasaun Estatal interinu.

Gaspar mós sei husu ba Ministru Administrasaun Estatal interinu atu  aprezenta dezeñu ne’e iha Konsellu Ministru katak konstrusaun ba uma andár merkadu Taibessi importante no urjente atu rezolve problema vendedór estrada ninin.

Seluk fali,  autoridade mós iha planu atu harii uma ida ho medida ki’ik iha merkadu Manleuana, atu akumula vendedór obralan iha Aimutin, Comoro, no fatin seluk-tan.

Tuir Gaspar, vendedór sira iha fatin hirak ne’ebé temi hakarak duni atu ba fa’an iha merkadu Manleuana,  maibé kondisaun mak ladún di’ak.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here