Sekretáriu Jerál Partidu FRETILIN, Marí Alkatiri, hatan jornalista sira hafoin enkontru ho Prezidente Repúblika, Francisco Guterres Lú Olo, iha Palásiu Prezidente, ohin. Foto Antonio Goncalves

DILI, 8 agostu 2019 (TATOLI) – Sekretáriu Jerál Partidu Frente Revolusionária Timor-Leste Independente (FRETILIN), Marí Alkatiri, preokupadu ho destinu traballadór timoroan 300 resin iha kampu Bayu-Undan bainhira kompañia petrolífera ConocoPhillips termina kontratu.

“Ha’u-nia preokupasaun boot liu maka timoroan sira ne’ebé serbisu to’o agora, hetan formasaun ona atu ba ne’ebé, ha’u husu sira atu lori ita nia ema sira ba serbisu iha fatin dignu ka lae. Sira dehan en-prinsípiu la’e, espera katak ita nia kompañia nasionál Timor GAP  bele rezolve sira”, tenik Alkatiri hafoin hasoru malu ho Reprezentante ConocoPhilips iha Comité Central da FRETILIN (CCF), kinta ne’e.

Nia dehan, oras ne’e, ConocoPhilips, Timor GAP no Autoridade Nasionál Petróliu no Minerál (ANPM) solusiona hela destinu traballadór timoroan sira ne’ebé oras ne’e servisu iha kampu Bayu-Undan.

Eis Primeiru-Ministru ne’e dehan tan, timoroan sira ne’ebé oras ne’e serbisu iha kampu Bayu-Undan, kontratante mak ConocoPhilips, no maioria hatene servisu ba área petróleu nian,  tanba ne’e Timor-Leste tenke uza rekursu ne’e bainhira ConocoPhilips termina kontratu.

Iha fatin hanesan, Jerente Nasionál ConocoPhilips iha Timor-Leste, José Lobato Gonçalves, hateten timoroan hirak ne’e hatene servisu iha setór petróleu.

“Saida mak ConocoPhillips fó maka dezenvolvimentu rekursu umanu. Ha’u fó ezemplu projetu Bayu-Undan, timoroan 300 resin mak servisu iha ne’ebá, tanba ne’e aban bain-rua projetu ne’e pelumenus ita iha tiha ona timoroan ne’ebé hatene servisu iha setór petróleu”, dehan José Gonçalves.

Nia akresenta, kontribuisaun boot hosi ConocoPhillips ba projetu Greater Sunrise iha futuru maka timoroan 300 resin ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here