Alfándega halo apreensaun serveja kaixa 200, foos saka 50, sigarru kaixa neen ho marka lian Xina inklui sasán seluk tan ne’ebé la tama iha dokumentu nota manifesta esportasaun nian,ohin. Foto MF

DILI, 09 agostu (TATOLI) – Diretór Nasionál Operasaun Alfándega, Julião José Ximenes, informa alfándega halo apreensaun serveja kaixa 200, foos saka 50, sigarru kaixa neen ho marka lian Xina inklui sasán seluk tan ne’ebé la tama iha dokumentu nota manifesta esportasaun nian.

“Sasán hirak ne’ebé ha’u temi la deklara iha dokumentu nota manifesta esportasaun nia laran, tanba ne’e sasán hirak ne’e konsidera deskamiñu” Julião Ximenes ba jornalista sira iha Portu Dili uainhira halo inspesaun ba sasán ne’ebé ekipa alfándega halo apreensaun, ohin.

Sasán hirak ne’e, lori hosi Kompañia Xineza ho naran WT One Trading LDA, kompañia ne’e lokaliza iha Bairo-Pite Hudi-Laran.

Julião Ximenes seidauk informa loloos kuantidade sasán tanba ekipa alfándega sei halo ezaminasaun nia laran maibé sei fó sai relatóriu loloos, enkuantu sasán hirak ne’e atu destrui ka la’e, ne’e depende ba instituisaun relevante tuir relatóriu hosi parte alfándega nian.

Iha ámbitu ezaminasaun ba sasán hirak ne’e, ekipa alfándega telefone direta na’in ba kompañia maibé lakohi atende, enkuantu na’in haruka de’it traballadór maka mai foti sasán.

Alfándega halo apreensaun ba sasán hirak ne’e tanba kontra lei alfándega nian, tuir dekretu lei númeru 14/2017 no 14/2016 ne’ebé ko’alia kona-ba rejime kontrolu tabaku nian, enkuantu kona-ba alkohol  lei la sita maibé lei tributária define kona-ba serveja, tintu no tua manas ne’ebé iha valór tuir lei tributária ne’ebé atribui.

Jornalista : Natalino Costa

Editora     : Maria Auxiliadora

HAKEREK NO HATÁN

Please enter your comment!
Please enter your name here