Prezidente Autoridade Munisípál Dili, Gaspar Soares. Imajen Tatoli/Cipriano Colo

DILI, 9 agostu 2019 (TATOLI)— Autoridade Munisipál Dili iha ona planu no sei ezekuta iha tempu badak atu muda terminál Becora ba Halidolar, Hera.

Prezidente Autoridade Munisípal Dili, Gaspar Soares, esplika, razaun muda terminál Becora iha tempu badak tanba realidade hatudu katak oras ne’e terminál Becora laiha kondisaun.

Kona-ba rai ne’ebé sei uza iha Hera ho nia medida ektár hitu,  ne’ebé sei halo terminál ida separadu no atu loke mós merkadu ida iha terminál sorin.

Objetivu husi loke merkadu iha Halidolar, Gaspar esplika, ne’e atu bele muda sai vendedór sira ne’ebé to’o oras ne’e kontinua okupa tasi ibun área Bidau Lecidere. “Iha Hera, sei iha terminál no iha sorin iha mós merkadu”, hateten Gaspar ba Agência Tatoli iha nia kna’ar fatin, sesta ne’e.

Entretantu, relasiona ho vendedór barak kontinua fa’an iha dalan ninin no lidun sira sidade Dili, Autoridade Munisípiu Dili seidauk iha planu atu loke tan merkadu.

Gaspar hateten to’o oras ne’e seidauk iha planu atu loke tan merkadu maski merkadu iha Dili rua de’it hanesan Taibessi no Manleuana.

Kona-ba sira ne’ebé fa’an modo tahan iha dalan ninin,  trotoár leten, nia konsidera hanesan vendedór temporáriu ne’ebé presiza mós kondisaun dignu, maibé seidauk to’o tempu atu prepara fatin própria ba sira.

Maibé, nia husu nafatin ba vendedór sira atu ba fa’an iha merkadu no proibidu fa’an iha trotoár leten. “Apelu ne’e la’ós mai husi ha’u maibé mai husi lee. Katak,  proibidu fa’an iha trotoár leten”,  Gaspar sublña.

Antes ne’e, Komisaun Justisa no Pás Dioseze Dili husu ba Autoridade Munisípiu Dili atu loke tan Merkadu iha Dili.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here