PNTL fó seguransa metin ba arguida soe bebé (taka sura-tahan iha oin) iha Tribunal Distritál Dili, Kinta (08/08/2019). Imajen/Domingos Piedade Freitas

DILI, 08 agostu 2019 (TATOLI) – Tribunal Distritál Dili (TDD), ohin, liuhosi desizaun final ba prosesu julgamentu primeiru interrogatóriu, aplika medida koasaun prizaun preventiva ba arguida ho inisiál EBM ne’ebé soe nia bebé iha area Merkadu Taibesi.

Notísia Relevante : Suspeita Soe Bebé Submete Ona Primeiru Interogátoriu

Fernando da Costa, advogadu privadu ne’ebé fó asisténsia legal ba arguida EBM esklarese katak, defeza simu provas ne’ebé TDD aplika ba suspeita prizaun preventiva tanba konsidera faktu provadu.

Nu’udar Defeza, Fernando da Costa, iha responsabilidade atu halo rekursu ba desizaun primeira instánsia nian  durante prazu loron 15 nia laran, tanba haree ba arguida nia kondisaun saúde la permite.

“Desizaun ne’ebé tribunal hatún, parte defeza halo tuir tanba tribunal hanoin elementu sira ne’ebé arguida halo provadu duni, maibé ami nia parte sei iha posibilidade halo rekursu tanba haree ba nia kondisaun saúde,” argumenta  Fernando da Costa, ba jornalista sira iha TDD, hafoin julgamentu.

Ba krime nee Ministériu Públiku promove ho krime Infantisídiu, no iha krime nee hatete inan ne’ebé oho nia oan durante partu no kuandu nia sei iha hela partu nia influénsia perturbadora sei hetan pena prizaun tolu (3) too tinan 10.

Audiénsia nee prezide hosi Juis Maria Modesta, parte Ministériu Públiku reprezenta Prokuradór, Reinato Bere Nahac, no  arguida hetan asisténsia legál hosi advogadu privadu, Fernando da Costa no Advogada Belmira Fernanda.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here