Estrutura FONGTIL no Prezidente Repúblika, Francisco Guterres Lú Olo, hasai foto hamutuk. Imajen Mídia PR

DILI, 8 agostu 2019 (TATOLI)—Sosiedade sivíl kompostu hosi Fórum Organizasaun Naun Governamentál (FONGTIL)  ho nia membru sira hala’o enkontru ho Prezidente Repúblika (PR),  Francisco Guterres Lú Olo, iha Palásiu Prezidente Nicolau Lobato, Bairru Pité,  kinta ne’e.

Objetivu hosi soru-mutu ne’e husu ba Prezidente Repúblika atu veta proposta alterasaun Lei Atividade Petrolíferu (LAP) no Lei Fundu Petrolíferu (LFP).

Lee mós: Aprovasaun Lei Haat Sei Hetan Benefísiu Hosi Ratifikasaun Tratadu Foun

“Ami mai husu Prezidente Repúblika atu veta proposta alterasaun LAP Ho LFP,” hateten reprezentante sosiedade sivíl hosi ONG La’o Hamutuk, Celestino Gusmão ba jornalista sira.

Proposta veta ne’e bazeia ba razaun mak hanesan, diskusaun ne’ebé hala’o iha Parlamentu Nasionál no fatin saluk, seidauk bele konvense sosiedade sivíl Kona-ba proposta alterasaun artigu 15 alínea a,  ne’ebé Parlamentu ho governu aumenta iha LFP ne’ebé ko’alia kona-ba instrumentu no investimentu públiku privadu liuhusi Timor GAP.

Nia hatutan, ida ne’e sosiedade sivíl seidauk hetan informasaun sufisiente atu bele fó apoiu ba governu no Parlamentu Nasionál (PN).

Sosiedade sivíl hanoin no konsidera ida ne’e perigu tebes tanba prejudika Fundu Petrolíferu, ne’ebé ho nia objetivu atu sustenta jerasaun ohin nian no aban bainrua.

“Ita imajina, se Fundu Petrolíferu iha tinan 10 oin mai hotu lalais,  ita sei hakerek de’it iha istória kona-ba Fundu Petrolíferu, maibé jerasaun oin mai sei la hetan,” tenik Celestino.

Razaun seluk, nia informa, bainhira Governu konsentra de’it ba iha área ka setór petrolífera, mak setór mal nutrisaun, edukasaun, saúde, bee-moos no saneamentu sei hakdasak. Aleinde ne’e, ema ki’ak sira sei kontinua hela ho difikuldade oioin.

Nia fó hanoin katak dala barak Governu ko’alia no fó sai katak setór petrolífera bele la’o no setór sira seluk mós bele la’o, maibé kestaun ne’e sosiedade sivíl la simu no husu atu hili dalan ida ne’ebé sustentável liu.

“Ita-nia Fundu Petrolíferu hanesan fundu úniku ne’ebé atu sustenta ita-nia nasaun tomak. Razaun ida ne’e mak sosiedade sivíl husu PR atu veta nune’e haruka ba fali Parlamentu Nasionál atu halo diskusaun kle’an liu-tan,” Celestino argumenta.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here