Membru Bankada CNRT, Adérito Hugo da Costa. Imajen Tatoli/Egas Cristóvão

DILI, 8 agostu 2019 (TATOLI)—Prezensa komunidade internasionál iha ámbitu selebrasaun Tinan 20 Konsulta Populár, bele observa mós progresu dezenvolvimentu Timor-Leste (TL) nian.

Deputadu Partidu CNRT, Adérito Hugo da Costa, hateten iha prosesu luta, komunidade internasionál fó apoia. Tan ne’e, hafoin tinan 20, sira mós iha obrigasaun observa progresu dezenvolvimentu iha Timor-Leste no povu nia moris.

“Konvida sira mai haree obra ne’ebé sira kontribui ona iha prosesu luta, hafoin ukun-aan povu nia moris no dezenvolvimentu di’ak ka lae, povu nia moris projeta ba oin di’ak ka lae. Karik seidauk di’ak, sira mós bele kurije tanba sira mós iha obrigasaun atu haree Timor-Leste nia dezenvolvimentu,” nia tenik iha resintu Parlamentu Nasionál, kinta ne’e.

Nia subliña, iha loron Konsulta Populár 30 agostu, posibilidade marka prezensa hosi Sekretáriu Jerál Organizasaun Nasaun Unida (ONU), António Guterres, ho bainaka importante sira seluk, maibé seidauk konfirma loloos.

“ONU hanesan Organizasaun ne’ebé aas liu iha mundu. Se Sekretáriu Jerál mai, ne’e furak tebes,” dehan Adérito Hugo.

Tuir ajénda ne’ebé iha, Sekretáriu Jerál ONU, António Guterres, sei halo diskursu iha  Parlamentu Nasionál, iha 30 agostu, tuku 09.00 otl.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here