Primeiru-Ministru, Taur Matan Ruak. Imajen: TATOLI

DILI, 8 agostu 2019 (TATOLI) – Primeiru-Ministru (PM), Taur Matan Ruak atualiza elaborasaun proposta Orsamentu Jerál Estadu (OJE) 2020 ba Prezidente Repúblika (PR), Francisco Guterres Lú Olo.

“Hato’o hela ba Prezidente Repúblika kona-ba preparasaun orsamentu 2020 no buka kumprii prazu ne’ebé lei hateten katak to’o loron 15 outubru Governu tenke lori ba Parlamentu Nasionál”, tenik Xefe Governu ba jornalista sira iha Palásiu Prezidensiál, hafoin hasoru malu ho PR, kinta ne’e.

Nia informa mós katak, Governu halo ona Jornada Orsamentál no halo ona aprovasaun tetu orsamentál 2020 liuhosi Konsellu Ministru ho montante billaun $1,6.

Notísia Relevante: Governu Aprova Ona Tetu Fiskál 2020

Oras ne’e Governu fahe envelope fiskál ba kada ministériu hodi ajusta ho montante ne’ebé tetu ona, molok lori ba Komisaun Revizaun Orsamentu.

PM konsidera montante OJE 2020 razoálvel tanba ho rekursu ne’ebé  iha sei garante kresimentu ejonomia rai laran.

“Ekonomia rai laran, Governu liuhosi Orsamentu Jerál Estadu mak sustenta makaas”,  dehan PM Taur.

Maski oras ne’e setor privadu sira husi rai liur no rai laran komesa mai atu investe, maibé Taur dehan ne’e seidauk to’o.

Kona-ba alokasaun ba área prioridade sira, xefe governu ne’e hateten Sei informa ba públiku iha tempu badak.

Entretantu, tuir kalendáriu OJE 2020 ne’ebé Konsellu Ministru aprova ona, tuir previzaun, sei halo iha sorumutuk iha loron 27 setembru 2019 hodi aprova Proposta OJE finál no sei haruka ba Parlamentu Nasionál iha loron 15 outubru hodi halo diskusaun no aprovasaun, nune’e promulgasaun bele hala’o iha dezembru 2020.

Nune’e mós Xefe Governu atualiza ba PR kona-ba preparasaun selebrasaun tinan 20 referendu.

Liuhosi Konsellu Ministru loron 31 jullu, aprova ona naran lubun ida ne’ebé inklui Estadu, individualidade no organizmu, hodi propoin ba Prezidente Repúblika atu bele fó kondekorasaun ho “Orden Timor-Leste nian” iha okaziaun selebrasaun aniversáriu ba dala 20 Konsulta Populár.

“Orden Timor-Leste nian” maka kondekorasaun ne’ebé ho prestíjiu no dignidade nasaun nian ne’ebé boot liu hotu, ne’ebé kria iha tinan 2009 atu rekoñese no agradese ba timoroan no ema husi nasaun seluk, ne’ebé, ba sira-nia komportamentu ka hahalok ne’ebé maka sira pratika, iha kontributu signifikativu ida ne’ebé fó benefísiu ba nasaun ne’e, ba timoroan sira ka ba Umanidade.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here