Ministru Agrikultura no Peska, Joaquim José Gusmão dos Reis Martins, kuarta, (19/2/2019). Imajen Egas Cristovão.

DILI, 08 agostu 2019 (TATOLI)-Ministru Agrikultura no Peska, Joaquim José Gusmão dos Reis Martins, hatete iha tinan oin sei fó prioridade ba setór peska liuliu asegura riku-soin (ikan) iha tasi-laran no apoiu peskadór sira hodi hasa’e produsaun ikan iha Timor-Leste.

“Iha Orsamentu Jerál Estadu 2020, ita komesa fokus ona ba área peska nian ne’ebé mak durante ne’e ita ladún fó atensaun”, Ministru Joaquim dehan iha Palásiu Governu, Dili, kuarta ne’e.

Ministru Agrikutura no Peska informa tetu pakote fiskál Orsamentu Jerál Estadu (OJE) 2020 ba Ministériu Agrikultura no Peska (MAP) hetan millaun U$7-resin.
Tanba ne’e, sei fó mós prioridade ba MAP kontinua foka ba hasa’e produsaun agríkola bazeia ba Planu Estratejiku Dezenvolvimentu Nasionál (PEDN) 2011 to’o 2030.

Atu hasa’e produsaun, MAP iha ona planu atu reabilita irrigasaun boot sira hanesan Waibaba, Bonuk , Karaulu, Bebui no Bulutu, Maliana I no Maliana II iha tinan 2020.

Tanba durante tinan rua, 2017 to’o 2018, laiha osan manutensaun ba irrigasaun sira ne’ebé rezulta bee komesa halai la tuir dalan hodi sobu natar sira.

“Ita sei foku ba reabilita irrigasaun boot sira Waibaba, Bonuk , Karaulu, Bebui no Bulutu, Maliana I no Maliana II, depois ne’e mak ita haree fali irrigasaun ki’ik oan sira ne’e”, katak.

Ministru Joaquim dehan atu hasa’e produsaun hare presiza duni irrigasaun di’ak hodi fasilita agrikultór sira halo natar.

“Ita atu hasa’e produsaun, maibé irrigasaun aat no bee laiha ne’e produsaun labele sa’e”, tenik governante ne’e.

Tuir dadus MAP iha 2017, difisil tebes ba iha agrikultór sira tanba enfrenta hela situasaun (El Niño), maibé agrikultór sira konsege prodús hare tonelada 36,995.87. Ho produsaun hare tonelada ne’ebé iha, halo ba foos kuaze tonelada 22,197.25 ne’ebé konsege prodús iha rai-laran.

Daudaun ne’e, natar ektare 2,026.74 mak sei utiliza sistema tradisionál katak hare kari de’it iha natar laran, du’ut la hamoos, kontrolu ba adubu ladi’ak no ektare 9,062.94 mak hare kari, fokit kuda fali, maibé la kuda liña no kontrola ba adubu, pestisida no bee ladún di’ak.

Ektare 771, 57 mak implementa ona sistema prátika agrikultura di’ak, katak hare kuda liña, kontrola ba adubu, pestisida, bee di’ak no du’ut moos.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here