Ministru Agrikultura no Peska, Joaquim José Gusmão dos Reis Martins. Foto/Mídia MAP.

DILI, 08 agostu 2019 (TATOLI)-Ministru Agrikultura no Peska, Joaquim José Gusmão dos Reis Martins, hatete dezenvolvimentu setór akikultura iha Timor-Leste daudaun ne’e la’o di’ak liu no povu maka sai benefisiáriu ba iha área ne’e rasik. Tanba ne’e, husu ba setór privadu atu investe iha akikultura.

“Rezultadu komesa iha ona, ita bele la’o hale’u bá haree iha fatin sira ne’ebé maka hanesan Maliana, Baukau no Ermera, ita iha rezultadu ne’ebé di’ak iha área akikultura nian”, Ministru Joaquim afirma iha konferénsia imprensa hafoin abertura Forum Nasionál Akikultura ba daruak iha Timor Plaza, Dili, ohin.

Ministru salienta forum daruak kona-ba akikultura iha Timor-Leste liuhusi programa ne’ebé apoiu husi Governu Nova Zelándia liuhusi parseiru dezenvolvimentu World Fish ne’e atu elabora polítika prátika akuakultura iha Timor-Leste ne’ebé liga ba hakiak ikan nian.

“Tanba ne’e maka liuhusi forum ne’e mós husu atu setór privadu sira apoia iha akikultura”, nia katak.

Governante ne’e hatete bá oin ho programa akikultura iha Timor-Leste, Governu sei tau atensaun sériu hodi integra loloos iha programa Governu nian, nune’e hakiak ikan ne’e iha nia rezultadu iha kolleita hodi bele fornese ba merenda eskolár atu sustenta nutrisaun labarik sira nian.

Iha fatin hanesan, Diretór Jerál Peska Ministériu Agrikultura no Peska (MAP), Acácio Guterres, informa apoia ne’ebé Governu Nova Zelándia fó através World Fish tulun ona grupu hamutuk 270.

“Grupu ne’ebé ita fasilita iha munisípiu tolu, Baukau, Ermera no Maliana. Grupu sira ne’e kompostu husi feto no mane, no ita iha maizumenus 1500 pessoas maka envolve iha área akikultura nian”, Acácio relata.

Reprezentante grupu akikultura Wefao Wenunu husi munisípiu Bobonaru, postu administrativu Maliana, Isac das Dores, katak programa akikultura ne’ebé apoia husi Nova Zelándia liuhusi parseiru dezenvolvimentu World Fish ne’e fó benefísiu ne’ebé di’ak tebes.

Nia dehan World Fish fahe ikan Nila ba sira no ikan ne’e rasik hakiak durante fulan haat to’o neen maka foin kolleita no sira iha tanke tolu ba hakiak ikan no kolleita ona ikan refere ba merenda eskolár ne’ebé fa’an ho presu kilo ida dólar 3.50 no kada fulan sira bele prodús to’o kilo 10 tanke ida.

Iha forum akikultura ba daruak, Ministru Agrikultura no Peska, Joaquim José Gusmão, lansa mós livru matadalan hakiak ikan nian. Ho livru ne’e bele fasilita liután grupu akikultura atubele hakiak ikan ho di’ak liután iha futuru.

Partisipa iha forum ne’e mak Embaixadór Nova Zelándia ba Timor-Leste, Philip Hewitt, Diretór World Fish, Gareth Johnstone, inklui diretór sira husi MAP no grupu benefisiáriu akikultura munisípiu tolu, Baukau, Bobonaru no Ermera  no entidade sira seluk.

Notísia relevante : Nova Zelándia Kontinua Tulun Timor-Leste Hodi Intensifika Setór Akikultura

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here