Kristu Luirai. Imajen/ Turizmu Timor-Leste

DILI, 08 agostu 2019 (TATOLI)-Konferensista semináriu internasionál Asia East Youth Gathedering (AEYG) no Familia Claretianu 2019 apresia no kontenta hetan oportunidade vizita  fatin turístiku relijiozu hanesan Kristu Liurai (Cristo Rei) ho João Paulo II.

Notísia Relevante : Bispu Virgilio Apresia Semináriu Internasionál AEYG

Teresa Liu Hsin Tien, juventude hosi Korea.

Konferénsia internasionál AEGY  ba tinan 2019 ne’ebé konsentra iha Dare ne’e  organiza hosi Kongregasaun Claretinu Timor-Leste no partisipa hosi nasaun hitu, hanesan Filipina, Taiwan, Korea, Xina, Macau, Indonézia, Timor-Leste ho total joven konferensista na’in 125.

Teresa Liu Hsin Tien, juventude hosi Korea sente hakfodak bainhira vizita fatin turizmu relijiozu  rua ne’e tanba foin primeira vez hetan estátua ho medida boot.

“Fatin ne’e bonita loos no estátua  mós boot tanba ne’e ha’u kontente vizita Timor-Leste no ha’u hadomi Timor-Leste,’’ hateten Teresa Liu Hsin Tien, ohin, iha ámbitu vizita ba Kristu Liurai.

Andrew Seo You Sung, nu’udar joven katóliku hosi Taiwan

Andrew Seo You Sung, nu’udar joven katóliku hosi Taiwan  espresa mós nia sentimentu ksolok bele hetan oportunidade mai Timor-Leste no vizita fatin turizmu relijiozu ne’ebé sagradu no nia paizajen ne’ebé  freska tebes.

Nia dehan, Timor-Leste  tenke orgullu ho ninia potensialidade turizmu ne’ebé iha no presiza atu prezerva hodi atrai turista vizita nasaun ne’e.

Iha biban hanesan Padre Pároku São Josè Ai-mutin Dili, Emanuel Lelo Talok C.M.F, hatete, vizita ne’e atu hametin liu tan fiar joven sira no mós atu promove turizmu relijiozu ne’ebé Timor-Leste iha ba nasaun partisipante Asia East Youth Gathedering 2019.

Konferensista na’in 125  hala’o mós vizita ba Orfanatu Madre Alma iha  Praia dos Queiroz, Orfanatu  iha Madre Dominican Bidau, Orfanatu Madre sira iha Maloa Ai-lok Laran no Fundasaun AHISAUN Ai-mutin ne’ebé durante ne’e  tau matan ba ema ho defisiénsia.

Vizita ne’e  ho objetivu fahe karidade ba oan ki’ak sira ne’ebé durante ne’e hela iha orfanatu haat ne’e.

Jornalista : Agapito dos Santos

Editór       : Francisco Simões

 

HAKEREK NO HATÁN

Please enter your comment!
Please enter your name here