Diretór Administrasaun Planeiamentu no Finansa, Adolmado Soares Amaral

DILI, 8 agostu 2019 (TATOLI)—Antes ne’e, órgaun ezekutivu Liga Futeból Amadora (LFA) publika ona ba públiku katak jogu segunda volta sei hala’o hotu iha Munisípiu Baucau no Maliana, maibé jornada 8-9 sei labele hala’o iha Baucau tanba jogu refere nia oráriu soke malu ho atividade Governu.

Enkuantu, dezlokasaun ba Maliana (Bobonaro) kontinua la’o nafatin tuir kalendáriu ne’ebé publika ona.

Lee mós: Jogu Segunda Volta LFA Sei Hala’o Hotu Iha Baucau no Maliana

“Jornada 8-9 ne’e ita labele hala’o iha Baucau tanba iha problema uituan tanba atividade balun Governu nian sei hala’o mós iha ne’ebá ho oráriu ne’ebé hanesan,” dehan Diretór Administrasaun Planeiamentu Finansa LFA, Adolmado Soares Amaral liuhosi konferénsia imprensa ne’ebé hala’o iha salaun Xanana Sport Center, Bairro Formosa, kinta ne’e.

Tanba ne’e, Autoridade Munisípiu Baucau, Sekretaria Estadu Juventude no Desportu (SEJD) hamutuk ho órgaun LFA hala’o ona soru-mutu hodi buka ona solusaun ba asuntu ne’e.

“Solusaun mak iha jornada 8-9 Baucau nian ita sei muda lai mai iha Dili. Hafoin atividade Governu ne’e finalizadu mak iha jornada 10 ba leten ita lori ba realiza fali iha ne’ebá. Entaun, ami hato’o ba adeptu no klube sira hotu tenke apár ho kalendáriu hosi Baucau nian,” nia esplika.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here