Enkontru entre estrutura FONGTIL no Prezidente Repúblika, Francisco Guterres Lú Olo. Imajen Mídia PR

DILI, 8 agostu 2019 (TATOLI)—Fórum Organizasaun Naun Governamentál (FONGTIL) ho nia membru sira  husu ba Prezidente Repúblika (PR),  Francisco Guterres Lú Olo, atu públika Tratadu Fronteira Marítima (FM) ne’ebé Parlamentu Nasionál (PN)  aprova ona.

Hafoin hasoru malu Ho xefe Estadu,  Diretór Ezekutivu FONGTIL, Daniel Carmo da Silva, hateten,  durante enkontru, hanesan sidadaun, sira fó hanoin ba Xefe Estadu atu bele publika ona tratadu ne’e iha Jornál Repúblika.

Lee mós: PN Aprova Rezolusaun Ratifikasaun Tratadu Entre RDTL no Austrália iha Finál Globál

FONGTIL husu publikasaun ne’e tanba ida ne’e mak espasu no tempu ona ba luta naruk ne’ebé koletivamente povu TL halo no nia rezultadu asina ona iha marsu 2018, no Parlamentu Nasionál aprova ona.

Aleinde ne’e, sosiedade sivíl husu mós ba PR atu haree didi’ak lei sira ne’ebé governu haruka ba Parlamentu Nasionál,  liliu lei ne’ebé importante loos atu regula kona-ba operasaun petrolífera no mós Lei Fundu Petrolífera.

Kona-ba asuntu ne’e, Daniel haktuir, Prezidente Repúblika rona ema hotu nia preokupasaun, sujestaun ne’ebé lejítimu, pertinente no Prezidente rasik konsidera hanoin hirak ne’e la vinkula ninia desizaun.

Tanba ne’e, Daniel mós husu ba ema hotu atu respeita kualkér desizaun ne’ebé Prezidente Repúblika foti no hanesan sidadaun di’ak tenke kolabora.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here