Enkontru entre Espoza PR no doutór espesialista sira ne’ebé hakotu ho hasai foto hamutuk. Imajen Mídia PR

DILI, 8 agostu 2019 (TATOLI)—Espoza Prezidente Repúblika (PR) Timor-Leste, Cidália Nobre Guterres, simu doutór espesialista timoroan na’in tolu hanesan Daninha Coelho, José António Gusmão no Domingas Bernardo, iha Palásiu Prezidente Nicolau Lobato, Bairru Pité, ohin.

Durante enkontru, ko’alia kona-ba oinsá atu fó atensaun ba kazu “soe bebé” ne’ebé númeru aumenta ba beibeik iha sosiedade nia leet.

Doutór José António, hatete katak kazu soe bebé kuaze akontese iha nasaun barak iha mundu liliu ba nasaun ki’ak no dezenvolvidu, iha ne’ebé fatin soe bebé preferénsia iha públiku hanesan iha lixu fatin, estrada, sintina no fatin seluk.

Tuir peskiza, razaun prinsipál soe bebé katak ki’ak (pobreza), presaun psikolójika sosiedade no família la fó apoiu no razaun seluk mak mane la tau ba responsabilidade.

Nia fó ezemplu katak sosiedade patriarkál hanesan Brazíl iha sékulu 20 la simu feto iha oan la’en laiha (maen solteira) maibé iha sékulu 21,  feto ne’ebé ko’us ka grávida la’ós mundu nia rohan (fim do mundo), signifika vida hotu ona ba nia, maibé  presiza hanoin katak dalan sei naruk.

“Nune’e, presiza buka hatene, iha Timor, nasaun ki’ik ho valór kulturál hanesan respeita malu no fó solidaridade ba malu aas tebes, maibé tansá mak ema sei soe bebé? Razaun saida?  No, ida ne’ebé mak bele kondena hahalok aat sira ne’e?” Doutór José kestiona.

Aleinde ne’e, Doutora Daninha no Domingas salienta katak, nu’udar ema umana sente preukupadu tebes ho situasaun ida ne’e, tanba hakarak koopera ho inan-nasaun atu bele fó solusaun ba kazu soe bebé liuhosi intervensaun advokasia liliu sosializasaun ba komunidade no família nu’udar núkleu prinsipál ne’ebé prepara akompaña oan-sira, hosi idade minoria bele hetan informasaun adekuada, prepara labarik sira fízikamente no psikolójikamente kona-ba saúde reprodutiva.

Kona-ba kestaun ne’e, Espoza Prezidente Repúblika, Cidália Nobre Guterres agradese tebes ba preukupasaun entidade tomak iha Timor-Leste hosi sosiedade sivíl, ajénsia internasionál no profisionál saúde, kona-ba atu soe bebé ne’ebé ohin loron akontese iha territóriu Timor-Leste. Liuhosi diskusaun entre inan-nasaun ho doutór espesialista sira bele hakle’an liu-tan hanoin ba oin, hodi sosializa nafatin atu inmorál ne’e.

 “Ha’u mós ba vizita uma-mahon sira no triste haree labarik idade hosi tinan 12 to’o 16  sai vítima ba kazu insestu, violasaun sexuál no ko’us-oan ho idade nurak. Nune’e, ha’u konkorda prefeitamente ita tenke halo duni buat ruma. Ha’u ninia gabinete laiha podér boot maibé bele halo programa advokasia atu  ajuda sensibiliza ka fó hanoin ba ita-nia sosiedade prinsipálmente inan-aman no joven sira idade pre-sekundária to’o ensiñu sekundáriu kona-ba asuntu refere. Ho nune’e, pelumenus iha idade produtiva sira hatene limitasaun no proteje-án,” Espoza PR subliña.

“Ho vontade tomak, hau husu ba ita hotu atu serbisu hamutuk hodi bele haforsa malu, maski labarik maibé ita bele halo asaun konkreta ruma hodi bele halo mudansa hodi fahe informasaun no  akompañamentu ba sira prinsipálmente ba família. Tanba família mak hún no abut ba kresimentu labarik. Tanba ne’e, presiza  atu prepara-án no hateke ba oin ho fiar-án katak maski hetan problema maibé sei iha dalan atu rezolve ho dalan ne’ebé dignu,” inan-nasaun ne’e salienta.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here