Bayu Undan. Foto espesiál.

DILI, 8 agostu 2019 (TATOLI) – Jerente Nasionál ConocoPhilips iha Timor-Leste, José Lobato Gonçalves, informa durante ekipa ConocoPhilips vizita Timor-Leste la’ós de’it hasoru malu ho parte Governu, maibé hasoru mós parte opozisaun hodi esplika lala’ok iha kampu Bayu-Undan.

“En-prinsípiu atualiza kona-ba lala’ok iha Bayu-Undan to’o ohin loron prodúz tiha ona hira no bainhira mak sei kontinua halo produsaun. Produsaun ne’e hahú iha 2004, kompañia hanoin katak produsaun ne’e sei la’o  tan tinan rua ka tolu, entaun entre marsu 2021 to’o 2022’’, nia tenik iha Comité Central FRETILIN (CCF), kinta ne’e.

Tuir nia, durante ne’e tékniku kompañia petrolífera ConocoPhillips halo ona estimasaun reseita.

Notísia Relevante: ConocoPhilips TL Kongratula Governu ba Serbisu Tratadu FM

“Tuir estimasaun karik sei fó reseita ba Estadu Timor-Leste entre billaun $0,7 ka millaun $700 to’o billaun $1,7“, dehan José Lobato.

Nia akresenta, reseita depende hosi produsaun, nune’e mós depende hosi folin mina-rai ninian, enkuantu parte Governu ho ConocoPhillips seidauk ko’alia kona-ba extensaun kontratu.

“Ida ne’e seidauk ko’alia, en-prinsípiu kontratu to’o 2022, atu kontinua ka lae ne’e ami seidauk ko’alia”, nia dehan tan.

Iha parte seluk, Sekretáriu Jerál FRETILIN, Marí Alkatiri, haktuir iha enkontru ohin, ekipa ConocoPhillips ko’alia kona-ba kalkulasaun reseita projetu Bayu-Undan ba futuru.

“Sira halo hela negosiasaun ho Timor GAP no Autoridade Nasionál Petróleu no Minerál (ANPM), para hasai besi tua sira iha tasi laran. Atu hasai de’it besi tua sira ho infraestrutura seluk iha rai maran iha Darwin no iha Timor-Leste, sei gasta tan mínimu billaun $1”, dehan Alkatiri.

Nia dehan tan, la’ós Timor-Leste mesak mak sei hasai kustu ba produsaun petrolífera maibé konsórsiu ne’ebé envolve mós sei hasai kustu hanesan tanba konsidera hanesan projetu ida.

“Hotu-hotu tenke gasta, iha diskusaun agora sé mak lidera projetu ne’e mak Timor-Leste, enkuantu Austrália ho kompañia sira ne’e halo konsórsiu”, dehan nia

Nia hatutan, kuandu kada barríl folin $80 mak sei prodúz billaun$1,9, to’o Bayu-Undan maran.

“See $40 de’it ba barríl ida, entaun prodúz de’it metade, signifika billaun $0,9 de’it. Sira mai informa ne’e mai ha’u”, tenik Alkatiri.

Entretantu, enkontru ne’e partisipa hosi reprezentante ConocoPhilips hanesan Vise Prezidente Sustentável, Komunikasaun no Asuntu Externu Negósiu Austrália Oeste, Kayleen Ewin, akompañadu hosi Jerente Nasionál ConocoPhilips iha Timor-Leste, José Lobato Gonçalves no Vise Prezidente ba Operasaun, Perfurasaun no Abastesimentu, David Boyle, ne’ebé hasoru malu ho parte opozisaun, Sekretáriu Jerál Partidu FRETILIN, iha sede CCF.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here