Deputadu Bankada CNRT, Adérito Hugo da Costa. Imajen Tatoli/ Egas Cristóvão

DILI, 8 agostu 2019 (TATOLI)—Partidu Kongresu Nasionál Rekonstrusaun Timor (CNRT-sigla portugés) hamutuk ho Partidu Libertasaun Populár (PLP) no União Democrática Timorense/Frenti-Mudança (UDT/FM) kontinuaasegura estabilidade polítika VIII Governu Konstitusionál.

Deputadu CNRT, Adérito Hugo da Costa, hateten CNRT kompete iha eleisaun hamutuk ho nia aliadu sira metin dezde koligasaun pre-eleitorál iha ELeisaun Antesipada 2018 hodi forma VIII Governu.

“Polítika sira iha atuál Governu relfleta partidu ne’ebé viabiliza VIII Governu mak CNRT, PLP ho KHUNTO no aliadu estratéjiku sira seluk hanesan UDT/FM,”  dehan nia iha resintu Parlamentu Nasionál, kinta ne’e.

Tan ne’e, nia afirma, kualkél korrespondénsia hanesan Proposta Lei no Proposta Rezolusaun mai hosi Governu hetan kedas kanál halo andamentu.

“Kuandu Governu ida hetan viabilizasaun hosi Parlamentu, ninia inisiativa sira sei pasa, kontráriu ho forma Governu sein maioria iha Parlamentu,” nia esplika.

Nia haktuir, bainhira forma Governu ida la hetan maioria kona-ba programa iha Parlamentu Nasionál, entaun susar asegura governasaun ida. “Ne’e mak regra konstitusionál,” katak Adérito Hugo.

Nia salienta, maski VIII Governu nia estrutura la kompletu, maibé estabilidade polítika iha Parlamentu Nasionál metin hela.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here