Prezidente Komisaun Organizadora ba Selebrasaun Aniversáriu Konsulta Populár, Xanana Gusmão ho Diretór ADN, Samuel Marçal, konversa ho Xefe Suku Bidau Santana, João Paulo de Andrade, hodi organiza estudante universitáriu no povu partisipa programa limpeza jerál. Imajen/Eugénio Pereira

DILI, 07 agostu 2019 (TATOLI)-Prezidente Komisaun Organizadora ba Selebrasaun Aniversáriu Loron Konsulta Populár ba dala-20 (30 agostu 1999-30 agostu 2019), Kay Rala Xanana Gusmão, sei hato’o konvite ba universitáriu sira iha Timor-Leste atu partisipa iha programa limpeza jerál  hodi prepara simu vizita bainaka internasionál mai partisipa festa konsulta populár ho ambiente sidade Dili ne’ebé moos.

Hahú iha tersa lokraik (06/08/2019) too kalan, Xanana ho Diretór Ajénsia Dezenvolvimentu Nasionál (ADN), Samuel Marçal, halo inspesaun ba prosesu  reabilitasaun uma tradisionál (uma adat) iha Tasi Tolu, no Jardín Motaél oin ne’ebé sei kuda ai-oan ba dame inklui vizita ba Jardín no Ponte B.J.Habibie iha Lesidere, haree lixu maka domina iha estrada no baleta  laran.

“Susar tebe-tebes. Ita liu ba Tasi Tolu, mai Raikotu too Comoro ponte  okos  too mai tan Bidau ne’e fo’er barak tebe-tebes soe iha estrada no mota laran. Ha’u di’ak liu ha’u konvida ita nia estudante UNPAZ, UNDIL, UNTL, UNITAL ho IOB sira mai ita hamutuk hamoos tiha fo’er sira ne’e para ema mai ne’e Dili moos uitoan,” hateten Xanana ba Ajénsia TATOLI, tersa lokraik (06/08/2019), iha Jardín B.J.Habibie Lecidere Dili.

Xanana sei haruka ekipa hakerek karta ba Reitór Universidade sira iha Dili inklui autoridade suku sira atu organiza povu hotu- hotu halo limpeza iha sira nia fatin.

“Ha’u prepara de’it maka bee ho fore rai ruma ba estudante sira para ita hotu  hamoos lisuk fo’er ne’e,” tenik Xanana.

Xanana mós apresia oras ne’e daudauk iha suku no bairru sira parte FALINTIL-Forsa Defeza Timor-Leste (F-FDTL)  ho Polisia Nasionál Timor-Leste  (PNTL), inklui autoridade suku komesa mobiliza komunidade hamoos ona fo’er balun.

Durante vizita Jardín no Ponte B.J. Habibie, Xanana bolu Xefe Suku Bidau Santana, João Paulo de Andrade, atu organiza povu koordena ho Autoridade Munisípiu Dili hamoos lisuk fo’er  iha área Mota Bidau no tasi ibun sira.

Iha fatin hanesan, Xefe Suku Bidau Santana, João Paulo de Andrade promete atu iha sesta feira no sábadu agora, nia parte sei organiza povu atu sira halo limpeza.

“Prontu ezekuta orden hosi exelénsia nian, tanba ami mós koopera ho  forsa sira halo hela limpeza iha kada sesta,” tenik nia.

Autoridade Suku ne’e rekoñese fo’er barak ne’ebé mota lori butuk nakonu iha Ponte B.J. Habibie nia okos la’ós povu Bidau Santana ba soe, maibé populasaun sira iha Kulu-hun, Lahane no Taibesi, Becuse no Becora dala ruma soe fo’er mota lori butuk hotu iha Tasi ibun Lesidere nian.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here