Labarik na'in-rua haree hela ró kruzeiru PACIFIC DAWN husi Austrália ne'ebé tula turista sira vizita Timor-Leste iha ámbitu komemorasaun aniversariu Loron Konsulta Populár ba dala-20 (referendu iha 30 Agostu 1999-30 Agostu 2019. Imajen/TATOLI.

DILI, 07 agostu 2019 (TATOLI)-Vizita ró kruzeiru ho naran Pacific Dawn ne’ebé, ohin, mai Timor-Leste fó benefísiu ekonómiku ba negosiante sira no promove turizmu Timor-Leste ba mundu.

“Ita haree katak sira (turista) nia vizita mai ne’e ekonómikamente fó benefísiu ba ita-nia komunidade sira, liuliu ita haree negosiante sira iha Portu no área Lesidere ne’ebé fa’an artezanatu no nuu laloir no ita-nia transporte públiku liuliu taxi, bus no mikrolete sira inklui iha aprezentasaun dansa kulturál”, Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, afirma ba jornalista sira iha Portu Dili, ohin.

Nia salienta, vizita kruzeiru ne’e mós promove direta sítiu turístiku sira iha Timor-Leste ba mundu tanba turista sira ne’e mai husi nasaun Austrália, Alemaña, Kanadá, Olanda no Fransa inklui balun husi Ázia.

“Ita mós esplika ba sira katak iha agostu ne’e Timor-Leste komemora loron Konsulta Populár dala 20 no misaun INTERFET (Forsa Internasionál ba Timor Leste) ho objetivu hatudu Timor-Leste nia imajen no naran di’ak ba mundu”, katak.

Turista hirak ne’e, nia dehan iha pakote rua mak pakote highlights travelling mak hala’o viajen ba sítiu turístiku iha Ermera no Likisá no independent travelling hala’o de’it iha kapitál Dili hodi vizita fatin turizmu sira hanesan Kristu Rei, Muzeu Rezisténsia, Chega no monumentu 12 Novembru.

José Quintas afirma iha janeiru ró kruzeiru vizita dala-rua no marsu dala-ida no ohin, mai tan ne’e pasu pozitivu ba Timor-Leste atu promove setór turístiku sira.

“Ita komesa hanoin ona atu hadi’a ita-nia infraestrutura bázika sira hanesan sítiu turístika sira liuliu kompleta ho hariis-fatin (toilet) hodi fasilita turista sira”, nia garante.

Iha fatin hanesan, turista husi nasaun Austrália, Jacqueline Akers ho idade 67, sente kontente vizita Timor-Leste tanba haree ba paizajen ne’ebé furak no sei naturál tebes.

“Ha’u foin mai dala-ida iha Timor-Leste no kontente haree Timor-Leste tanba paizajen furak tebes”,  katak nia ho kontente.

Turista sira ne’ebé mai vizita Timor-Leste ho Ró Kruzeiru FACIFIC DAWN husi Austrália haree no sosa hela sasán tradisionál ne’ebé negosiante sira fa’an iha ponte kais Dili, 7 Jullu 2019. Turista sira nee vizita Timor-Leste iha ámbitu komemorasaun aniversáriu loron Konsulta Populár ba dala-20 (referendu iha 30 Agostu 1999-30 Agostu 2019. Imajen/TATOLI.

Vendedór artezanatu iha Lesidere, Maria Olandina, sente kontente mós tanba vizita turista sira ne’e bele halo sira-nia sasán folin. “Sira mai hola barak loos no ami-nia sasán folin tebes”, katak.

Aléinde ne’e, kondutór bus Romantis, Martinho Ameta, dehan vizit kruzeiru ho turista sira ne’e hetan benefísiu tanba sira sa’e bus hodi bá vizita iha sítiu turístiku sira iha kapitál Dili no munisípiu Likisá no Ermera.

“Ami kuaze hetan osan uitoan tanba turista sira sa’e ami-nia karreta”, nia salienta.

Ró Kruzeiru Pacific Dawn ne’e husi Darwin-Austrália no iha Timor-Leste durante oras ualu, to’o iha Dili tuku 7:00 dadeer no kontinua nia viajen iha 17:00 loraik bá illa Komodo-Indonézia.

Ró ne’e ho nia pasajeiru inklui tripulante sira hamutuk 2.020 no totál turista de’it hamutuk 1.658.

Notísia relevante : Aban, Ró Kruzeiru Pacific Dawn Vizita Timor-Leste

Bernstein:  Hateke Husi Dook Haree Timór Illa Ida Bonita

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here