Vice Ministra Saude ba Kuidadu Saude Primaria, Elia Amaral kous hela bebe ida iha selebrasaun semana Mundial susuben Inan Nian, iha Salaun Ministeriu Saude Kaikoli Dili 7 Agusto 2019.Imajen/ Media Ministerio Saude

DILI, 07 agostu 2019 (TATOLI)—Oitavu Governu Konstitusionál liuhusi Minstériu Saúde selebra Semana Mundiál Ba Bebé no Inan 2019 ho tema “Haforsa Família Fó Apoiu Inan Sira Fó Susubeen Inan Ba Bebé”.

Selebrasaun refere ezije responsabilidade ba governu sira iha mundu tomak hodi asegura direitu inan sira atu fó susubeen ba bebé sira no mós enkoraza família sira atu fó inan nia susubeen ba bebé. Kada tinan, kampaña mundiál ida ne’e envolve profisionál saúde, edukadór ka profesór sira no sosiedade sivil hamutuk nasaun 120.

“Susubeen inan sai hanesan prosesu importante liu atu garante saúde bebé ho inan nia susubeen ne’ebé riku ho bee, vitamina, proteina, gorduras no nutriente esensiál ba dezenvolvimentu protesaun bebá durante fulan neen dahuluk to’o tinan rua ka liu,” dehan Vise Ministra Saúde ba Kuidadu Saúde Primária, Élia A. A. dos Reis Amaral, iha ninia diskursu ba selebrasaun loron nasionál fó susubeen inan nian ba bebé, iha Salaun Palásiu das Cinzas, Kaikoli,  Dili, kuarta (7/8/2019).

Governante ne’e hatutan, susubeen inan nian bele fortalese sistema imunidade ba bebé no labarik sira tanba proteje bebé kontra infesaun hanesan moras vias respiratorias no infesaun. Inan nia susubeen bele proteze labarik kontra moras kronika hanesan kankru raan, diabetes no asma tuir kontaktu entre bebé no inan durante alimentasaun.

Tanba ne´e, nia salienta, susubeen inan nian nu’udar proteina ne’ebé fasil liu ba bebé atu kombate anemia (menus raan) no falta raan tanba susubeen inan nian kontribui ba dezenvolvimentu intelektuál labarik nian.

Bainhira, nia haktuir, ita la fó apoiu ba inan sira atu fó susubeen inan nian no família hili liu susubeen formula sira ne’ebé fa´an iha supermerkadu sira sei fó impaktu boot ba ekonómia uma laran. Tanba, nia informa, susubeen formula ne’e mós sei fó risku boot ba bebé tanba la hanesan ho susubeen inan nian.

Aleinde ne’e, nia haktuir, Governu Timor-Leste liu husi Ministériu  Saúde iha komprimísiu atu haforsa família hodi fó susubeen inan nian hanesan dalan ida atu atinji objetivu Dezenvolvimentu Sustentavel númeru rua ne’ebé liga ho nutrisaun saúde ho edukasaun.

Notísia relevante:Susubeen Inan Nakonu Imunidade Ba Bebé Hodi Kontra Infesaun

Jornalista: Felicidade  Ximenes

Editór       : Rafy Belo

HAKEREK NO HATÁN

Please enter your comment!
Please enter your name here