Sesaun plenária Parlamentu Nasionál. Imajen dok. Tatoli

DILI, 7 agostu 2019 (TATOLI)—Segundu Vise Prezidente Parlamentu Nasionál, Luís Roberto, hateten, iha 15 agostu, Parlamentu Nasionál (PN) hahú resesu.

Nia esplika, tuir rejimentu Parlamentu Nasionál nian, loloos resesu tiha ona iha 15 jullu liu-ba, maibé tanba diskusaun ba alterasaun lei haat ho proposta rezolusaun ida, entaun resesu ne’e adia to’o ohin loron.

Luís hatutan, maski resesu ne’e rejimentu fó dalan, maibé sei hein Prezidente Parlamentu Nasionál, Arão Noé de Jesus da Costa Amaral, ne’ebé oras ne’e hala’o hela tratamentu saúde iha Singapura.

Tuir nia, 8 agostu aban, Prezidente Parlamentu Nasionál, Arão hahú tama ona serbisu hodi prezide plenária iha semana oin no foti mós desizaun ba resesu tuir rejimentu Parlamentu nian.

“Iha 15 agostu, hakarak ka lakohi tenke resesu duni, tanba diretu ami-nian. Tuir lei, ami resesu fulan-rua, maibé resesu ida ne’e fulan ida, katak loron 15 agostu hahú no 15 setembru ami tama fali ona,” Luís ba jornalista iha Parlamentu Nasionál, kuarta ne’e.

Nia hateten, ho resesu ne’e maski iha uma, maibé sei estuda mós lei balun ne’ebé sai ona ajenda importante hanesan Lei Antí Korrupsaun no lei sira seluk.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here