Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/António Gonçalves

DILI, 7 agostu 2019 (TATOLI)—Ministru Negósiu Estranjeiru no Kooperasaun, Dionísio da Costa Babo Soares, aprezenta ba Konsellu Ministru, ohin, relatóriu progresu kona-ba prosesu adezaun Timor-Leste ba ASEAN (Association of Southeast Asian Nations).

Dionísio hateten, Timor-Leste nia adezaun konsidera nu’udar prioritáriu iha kontestu polítiku esternu nian no sei reprezenta impaktu ida pozitivu ba dezenvolvimentu nasionál, ho benefísiu boot ba ekonomia no sosiál.

“Tinan 2019 sei sai tinan ida desisivu atu halo avaliasaun ida pozitivu kona-ba Timor-Leste nia kapasidade atu kumpri ezijénsia hosi pilár tolu ASEAN nian no tatuir kedas, adezaun nu’udar Estadu-Membru,” Babo dehan liuhusi komunikadu imprensa ne’ebé Tatoli asesu hosi Mídia Konsellu Ministru iha Palásiu Governu, Dili.

Nia haktuir, Timor-Leste adere ba Fórum Rejionál ASEAN nian iha tinan 2005 no entrega ona kandidatura ba Estadu-Membru ASEAN iha tinan 2011.

Hafoin vizita delegasaun boot Timor-Leste nian ba Sekretariadu ASEAN, entre loron-3 no loron-7 setembru, Timor-Leste sei simu misaun esploratóriu, hodi reprezenta atividade ne’ebé ho impaktu boot iha prosesu adezaun Timor-Leste nian, hahú hosi loron ne’ebé halo entregue formál kandidatura iha tinan 2011.

Hafoin reuniaun Konsellu Ministru ramata, Ministru Reforma Lejizlativa Asuntu Parlamentár, Fidelis Manuel Leite Magalhães reforsa tan katak Konsellu Ministru rona asuntu ne’ebé Ministru Babo relata no la kle’ur tan ofisiál balun hosi ASEAN nian sei mai Timor-Leste atu haree kona-ba estatutu no prontidaun pilár sira hosi xave ASEAN nian.

Fidelis haktuir, Ministru Negósiu Estranjeiru no Koperasaun husu atu membru Governu hotu tenke disponibiliza tempu atu bele hasoru delegasaun ne’ebé sei mai iha tempu besik.

Pilár tolu ASEAN ne’ebé kandidatu membru ASEAN sira presiza priénxe mak hanesan Pilár Ekonomia ka AEC (ASEAN Economy Community), Pilár Seguransa ka ASC (ASEAN Security Community) no Pilár Sosiál Kultura ka ASCC (ASEAN Social Culture Community).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here