Ministra Finansa en-ezersísiu, Sara Lobo Brites. Imajen Tatoli/Egas Cristóvão

DILI, 7 agostu 2019 (TATOLI)—Ministra Finansa iha ezersísiu, Sara Lobo Brites, aprezenta proposta Dekretu-Lei kona-ba primeira alterasaun ba Estrutura Orgánika Autoridade Aduaneira no Atividade Tributária Timor-Leste nian iha Konsellu Ministru (KM).

Maibé, aprezentasaun refere Konsellu Ministru sei fó tan tempu atu bele lee didi’ak fila fali nune’e bele fó apresiasaun no halo deliberasaun ruma kona-ba proposta rua ne’e.

“Ami rona proposta loloos hosi alterasaun ne’e. Ida ne’e di’ak tebes atu dinamiza funsionamentu ba Autoridade Aduaneira no Tributária hodi bele kontribui di’ak liu-tan ba ita-nia esforsu reforma fiskál no finansa públiku nian,” dehan Ministru Reforma Lejizlativa Asuntu Parlamentár, Fidelis Manuel Leite Magalhaês iha Palásiu Governu, ohin.

Entretantu, objetivu hosi alterasaun refere atu buka no haree ba komplisidade kna’ar ne’ebé Autoridade Aduaneira dezempaña, halo ajustamentu balun ne’ebé permiti atu administrasaun bele hatán kedas ho transparante ba dezafiu sira ne’ebé infrenta loro-loron.

Tanba ne’e, Ministra Finansa husu ba Konsellu Ministru atu halo alterasaun ba estrutura no atribuisaun hosi serbisu sira hosi serbisu sentrál Autoridade Aduaneira nian, hodi haree mós ba nia estrutura no reformulasaun ba ninia atribuisaun kompeténsia sira ho objetivu atu bele di’ak liu-ba nesesidade no garante prestasaun serbisu ida efikásia no efesiénsia ba sidadaun hotu.

Alterasaun ba proposta Dekretu-Lei refere liliu ba estrutura no atribuisaun sira hosi serbisu sentrál Autoridade Tributária serbisu sira kona-ba deklarasaun no likuidasaun jestaun antifraude, devolusaun no reenbolsu ba impostu ba valór akresentadu aprovizionamentu no kontratu.

Nune’e, sistema informasaun no rejistu kontribuinte relasaun internasionál tributária komunikasaun no relasaun públika ba kontratante no sub-kontratante ba inspesaun tributária petrolífera no ba inspesaun tributária minerál.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here