Emprezáriu Jape Kong Chu

DILI, 7 agostu 2019 (TATOLI) – Reprezentante Dili Development Company, Lda (Timor Plaza), Jape Kong Su, Tony Jape no Alan Jape, hasoru malu ho Primeiru-Ministru (PM), Taur Matan Ruak, hodi aprezenta proposta investimentu iha área aviasaun.

Biban ne’e, Jape Kong Su hateten nia parte prontu lori kompañia aviasaun foun tama Timor-Leste, tanba tuir nia observasaun ikus ne’e mosu kompetisaun ne’ebé la saudável entre Kompañia aviasaun sira ne’ebé iha ona, liliu manipulasaun folin billete rute Dili-Denpasar ka Denpasar-Dili kontinua aas.

“Ha’u prontu atu halo sósiu ho kompañia seluk hodi lori aviaun foun, atu bele fasilita movimentu turista mai Timor-Leste”, tenik Jape ba jornalista sira iha Palásiu Governu, kuarta ne’e.

Nia hatutan, durante ne’e númeru turista ne’ebé vizita rai laran menus tanba impaktu husi folin billete ne’ebé karun tebes.

Tanba ne’e, Jape konsidera bainhira lori kompañia aviasaun foun hodi mai investe iha Timor-Leste, bele garante númeru turista ne’ebé vizita rai laran sei aumenta no fó impaktu pozitivu ba dezenvolvimentu ekonomia mikro iha rai laran.

Nia haktuir, iha enkontru ohin, Xefe Governu apresia no fó apoiu tomak ba kualker investimentu ne’ebé Jape halo, liliu iha parte aviasaun nian.

Antes nee, eis Prezidente Repúblika, José Ramos Horta mós hasoru malu ho PM Taur,  hodi hato’o preokupasaun kona-ba folin bilete aviaun ne’ebé kontinua aas no iha momentu ne’ebá mós nia konsege lori investór hodi mai investe iha área aviasaun.

Aleinde ne’e, parte barak mak hatudu ona interese atu ajuda Governu solusiona problema folin billete ne’ebé kontinua aas.

Entretantu, tuir observasaun Tatoli, ajénsia viajen sira kontinua fa’an billete aviaun rute Dili-Denpasar ho folin entre $220 to’o $300, hahù husi janeiru 2019 to’o agora.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here