Dezastre Naturaís iha Dili iha tinan 2018. Imajen/MSSI

DILI, 07 agostu 2019 (TATOLI)-Ministériu Solidariedade Sosiál  no Inkluzaun (MSSI) liuhosi Diresaun  Asaun Sosiál   Dezastre Naturál Munisípiu Dili, fó ona apoiu emerjénsia ba vítima dezastre naturaís (anin sobu uma) hamutuk 46 iha Suku Camea, Postu Administrativu Cristo Rei, Munisipíu Dili.

Koordenadór  ba Asaun Sosiál Dezastre Naturál MSSI, Munisípiu Dili,  Fidelis Mesquita Araújo,  relata, kazu dezastre naturaís ne’e akontese iha loron 01 fulan agostu 2019 iha Aldeia Aidak Behare  hodi rezulta uma 23 aat, ho kategoria tolu maka hetan estragus todan no uma 19 estragus kaman.

Ekipa servisu kompostu hosi Ministériu Solidariedade Sosiál no Inkluzaun, Protesaun Sivíl no Autoridade lokál Suku Camea hahú loron 01 to’o 05 fulan agostu ne’e, distribui ona apoiu emerjénsia ba família vítima sira hanesan foos, mina, lona, bikan, kanuru, sanan, rinsu, sabaun no seluk tan.

Iha loron hanesan akontese dezastre anin boot  iha  Aldeia Namalae,  Suku Camea hodi   rezulta uma komunidade  26  estragus, maibé hosi númeru ne’e uma 19 maka estraga todan no  hitu estraga kaman.

 “Uma tolu de’it maka estragus todan, maibé uma rua nulu anin sobu de’it dapur,” hateten Fidelis Mesquita Araújo, ba Ajénsia TATOLI, ohin, iha ninia servisu fatin, Vila-Verde, Dili.

Ba uma ne’ebé hetan estragus todan, Fidelis Mesquita Araújo, salienta, ekipa servisu sei kontinua halo verifikasaun hodi relata ba nasionál atu fó apoiu materiál konstrusaun.

Jornalista : Osória A.Marques

Editór       : Francisco Simões

HAKEREK NO HATÁN

Please enter your comment!
Please enter your name here