Deputadu Partidu Demokrátiku, Adriano do Nascimento. Imajen António Goncalves

DILI, 7 agostu 2019 (TATOLI)—Deputadu Partidu Demokrátiku (PD), Adriano do Nascimento, hateten ezekusaun orsamentu 2019 la la’o tanba impaktu hosi estrutura VIII Governu ne’ebé la kompletu no hasoru problema iha planeiamentu.

“Ha’u mós uluk sai ministru. Atu asina de’it dokumentu mós presiza lori tempu. Se dehan laiha impaktu, ha’u hanoin ne’e la loos, satán ministru ida lori ministériu barak,” nia dehan iha resintu Parlamentu Nasionál, kuarta ne’e.

Lee mós: Governu Tenke Estabelese Prazu Solusiona Estrutura Governu

Nia haktuir, ho estrutura VIII Governu ne’ebé la kompletu ne’e halo ezekusaun orsamentu 2019 nian ki’ik tebes.

“Ezekusaun ne’e ki’ik tanba fatór membru governu la kompletu. Segundu, planeiamentu sai kestaun tanba ambisiozu liu, entaun susar tebes atu alkansa objetivu,” Adriano haktuir.

Nia fó hanoin, labele hanoin mak tau osan boot ba tinan 2020, maibé osan ne’e tenke haree ba programa, tanba orsamentu ne’e atu finánsia planu. “Ita gasta osan tuir ita-nia kbiit no ita gasta osan boot tenke tuir planu asaun,” nia subliña

Antes ne’e, Ministra Finansa en-ezersísiu, Sara Lobo Brites, fó sai katak ezekusaun orsamentu 2019 nian atinje pursentu 46.8.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here