Deputadu Bankada Partidu Demokrátiku, Adriano do Nascimento. Imajen dok. Tatoli

DILI, 7 agostu 2019 (TATOLI)—Partidu sira iha papél ba estabilidade polítika iha rai laran no atu garante estabilidade polítika líder sira tenke tuur hamutuk liuhosi diálogu.

“Katuas sira (líder nasionál) tenke tuur hamutuk. Se katuas sira lori ita ba konfuzaun, ha’u hanoin tenke para ona. Katuas sira tenke rezolve problema ne’e nia hún,” hateten Deputadu Partidu Demokrátiku (PD), Adriano do Nascimento, iha Parlamentu Nasionál, kuarta ne’e.

Deputadu ne’e krítika jerasaun tuan sira, tanba lakohi diálogu. “Katuas balun dehan diálogu la importante, ha’u (Adriano) krítika ida ne’e,” nia realsa.

Vise Xefe Bankada FRETILIN, Francisco Miranda Branco. Imajen Tatoli/Egas Cristóvão

Nia preokupa katak sá governu mak ministru ida bele lidera ministériu ualu (8) no sia (9) kedas. “Ezekusaun orsamentu no pagamentu ba kompañia sira la la’o, tanba ne’e diálogu importante hodi solusiona inserteza polítika ne’e,” katak nia.

Entretantu, Vise Prezidente Bankada FRETILIN, Francisco Miranda Branco, akresenta, diálogu ne’e importante iha sosiedade no estadu ne’e.

“Ha’u hanoin estabilidade polítika ne’e importante tebes. Tanba ne’e mak ami sempre apela diálogu. Ema balun interpreta dehan diálogu atu fahe kadeira, lae. Diálogu ne’e atu garante estabilidade polítika,” dehan Branco.

Tuir nia, liuhosi diálogu mak bele iha komunikasaun ba malu no loke kanál ba malu, tanba estadu ne’e iha forsa barak—forsa balun iha polítiku, forsa balun reprezenta sosiedade sivíl no forsa morál nasaun nian maka Igreja Katólika.

“Ita labele halo interpretasaun katak kuandu ejize diálogu ne’e atu fahe kadeira. Ko’alia ba malu entre órgaun soberania sira, entre partidu polítiku, tanba interese estadu ne’e boot liu. Ida ne’e mak presiza interpreta loloos ba diálogu ne’e,” tenik Branco.

Nia salienta, estadu ne’e ema hotu-hotu nian, la’ós kaer ukun nian de’it, entaun diálogu mak bele nakloke ba malu.

“Estadu ne’e ita hotu nian, balun opozisaun, balun kaer ukun, hotu-hotu nia interese ba di’ak no ba Estadu Timor-Leste,” nia esklarese.

Iha parte seluk, Segundu Vise Prezidente Parlamentu Nasionál, Luís Roberto, hateten diálogu ne’e importante duni, maibé partidu ida-idak tenke hadi’a lai uma laran hafoin ko’alia ho partidu ne’ebé kaer ukun.

Nia salienta, labele dehan diálogu ne’e laiha, labele tuur iha fatin de’it mak ko’alia ho arrogánsia polítika. “Diálogu ne’e iha tipu oioin. Kuandu diálogu ne’e tama ona iha partidu polítika, imposível dehan la fahe kadeira. Kuandu Igreja mak dehan la fahe kadeira, ne’e loos, maibé partidu polítika ida mak ejize diálogu la hanoin kadeira, ne’e bosok,” nia subliña.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here