Selesaun Nasionál U-15 to’o hikas iha Timor-Leste. Imajen Tatoli/Hortençio Sanchez

DILI, 6 agostu 2019 (TATOLI)—Jogadór Selesaun Nasionál U-15 ohin to’o ona Aeroportu Internasionál Prezidente Nicolau Lobato Comoro ho aviaun Sriwijaya tuku 02:00 otl, hafoin partisipa jogu Asian Football Federation (AFF) iha Tailándia.

Jogadór hirak ne’e fila hikas mai Timor-Leste tanba la konsege hakat ba meiu finál bainhira derrota kontra Vietname iha jogu ikus.

Ba jornalista sira iha salaun Xanana Sport Center, ohin, Adjuntu Sekretáriu Jerál Federasaun Futeból Timor-Leste (FFTL), Frederico Martins hateten durante ne’e selesaun nasionál joga kapa’as loos lidera tabela klasifikasaun provizóriu maibé lakon de’it ho Vietname entaun la konsege hakat ba faze meiu finál.

“Sira lakon la’ós sira laiha kapasidade maibé tanba de’it espekulasaun hirak ne’ebé mídia Indonézia nian fó sai barak katak ita-nia jogadór sira na’ok tinan, maibé laiha. Ho ida ne’e hotu mak halo jogadór sira-nia mentalidade tuun akontese nune’e,” dehan Frederico.

Nia dehan, espekulasaun ne’ebé mídia Indonézia halo la’ós hosi ema seluk iha timoroan balun mak fai lia hosi kotuk.

Frederico hatutan, ida ne’e sai hanesan esperiénsia no lisaun no seidauk sorte ba Timor-Leste atu hakat ba oin iha eventu hirak hanesan ne’e.

Lori FFTL tomak nia naran, nia husu ba públiku hotu ne’ebé hadomi futeból loron seluk labele halo atitudi hanesan ne’e, tenke hamutuk suporta Selesaun Nasionál tanba reprezenta nasaun.

“Karik ema ruma la gosta estrutura FFTL ne’e pesoál ita ida-idak nian. Buat ida importante mai ita mak Selesaun Nasionál númeru ida, biar hasoru krítika barak ita suporta nafatin ita-nia Selesaun Nasionál,” nia fó hanoin.

Entretantu, maski la konsege hakat ba oin iha eventu AFF ne’e, maibé jogadór hirak ne’e sei kontinua halo nafatin treinamentu hodi partisipa fali iha jogu Asian Football Confederation (AFC) setembru mai ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here