Prezidente Klube AD- SLB, Kay Rala Xanana Gusmão no fundadór sira simu taxa hosi ekipa Klube AD-SLB Voleiból durante serimónia agradesimentu iha salaun Xanana Sport Center, Dili. Imajen/Eugénio Pereira

DILI, 06 agostu (TATOLI)-Ajénsia Kooperasaun Internasionál Koreia (KOICA-sigla inglés) fó apoiu fundus tokon $4 hodi harii Akademia Desportu no Estádiu Multi Funsaun ba Klube AD-SLB Laurara.

Fundadór Klube AD- SLB, Miguel “Manetelu” ho Filomeno Pedro Cabral, akompaña hosi Prezidente Klube, Kay Rala Xanana Gusmão simu taxa hosi ekipa AD-SLB durante serimónia agradesimentu iha salaun Xanana Sport Center Dili. Imajen/Eugénio Pereira

Prezidente Klube AD-SLB, Kay Rala Xanana Gusmão,  hato’o agradese ba KOICA ninia apoiu no agora  daudaun sira nia parte buka hela rai kuaze ektare 10 hodi bele harii estádiu iha tinan ne’e.

“KOICA fó apoiu totál hakarak halo estádiu multi funsaun kompletu ho Akademia Desportu ba jogu futeból, voleiból, boxing, basket ho mós fatin desportu sira seluk. Maibé ha’u buka hela rai. Iha tinan ne’e ba oin, ita bele harii ona estádiu nee,” hateten Xanana, ba Ajénsia TATOLI, bainhira partisipa serimónia agradesimentu ho ekipa Klube AD-SLB iha Xanana Sport Center Dili, foin lalais ne’e.

Xanana esplika, akademia desportu ne’e sei kompletu ho fasilidade desportu oin-oin ne’ebé ekipa modalidade AD-SLB nian hotu bele uza hodi treinu no prepara sira nia aan sai fini jogadór iha modalidade desportu oin-oin bele prepara aan kompete iha desportu intensionál.

“Estádiu ne’e sei iha fasilidade tomak ba jogu, imi ba treinu no toba iha ne’ebá konsentrasaun ba buat hotu-hotu too pixina olímpika mós iha no imi bele treinu prepara imi nia aan, atu ita kompete iha desportu internasionál,” tenik Xanana.

Prezidente AD-SLB  no lider rezisténsia ne’e hatutan, nia harii klube ho modalidade desportu barak la’ós atu buka sai kampiaun para manan taxa, maibé buka prepara fini jogadór Timoroan di’ak atu kompete iha futuru desportu internasionál ne’ebé sei hamorin imajen Timór liu husi desportu.

“Klube AD-SLB ida ne’e ninia objetivu boot la’ós atu manan,  maibé atu forma jogadór iha desportu hotu-hotu para ita hetan fini jogadór iha futuru bele hamorin Timór  rai li’ur,” dehan Xanana.

Xanana hatutan, ba futuru AD- SLB nia jogadór sira tenke sai eroi ba iha desportu hotu-hotu, atu nune’e, bele evita lori jogadór hosi rai seluk mai fali Timor-Leste.

Iha parte seluk, Xanana kontra uitoan ho polítika klube futeból balun iha Dili, tanba Liga Futeból Amadora (LFA) harii atu hamoris desportu iha Timor-Leste para fó oportunidade ba klube sira hili fini jogadór di’ak hosi Timor-Leste para bele prepara aan kompete iha desportu hotu, maibé ideia kontráriu bainhira LFA eziste klube sira kontratu fali jogadór li’ur too haluha atu identifika fini jogadór di’ak iha kada munisípiu ne’ebé barak loos seidauk hetan oportunidade atu tama iha klube.

“Ha’u admira, ha’u haree klube seluk haruka (jogadór) hosi Brazíl, Afrika, Indonézia. Ema sira ne’e ita dehan Liga Amadora Timor-Leste (LFA) sira profisionál tiha ona hodi estraga fali jogadór sira seluk. Mais la buat ida, ba AD-SLB tenke promove ita nia jogadór rai laran sira ne’ebé di’ak ona atu hakiak di’ak liután, para ita  hili ita nia fini jogadór timoroan rasik,”  afirma Xanana Gusmão.

Xanana apela ba jogadór Ekipa Nasionál U-14, U-15, U-18 no Ekipa Nasionál Senior labele kontente depois ho vitória ne’ebé sira hetan, tanba importante ba Klube maka kada tinan promove jogadór foin hodi reprezenta TL.

“SLB nia objetivu la’ós manan taxa, manan jogu. Se manan di’ak liu ba istória ita nia klube, mais atu forma  jerasaun foun jogadór joven feto-mane iha modalidade desportu hotu-hotu, ne’e mak importante liu,” tenik nia.

Nia husu ba ekipa treinadór SLB ho ekipa kompostu hosi ema 200 liu ne’e bainhira tama iha klube tenke iha espíritu no nasionalizmu disiplina iha regra no labele fuma, hemu tua no ransu livre para lori  klube kompete iha jogu hotu- hotu di’ak.

Iha fatin hanesan, Vise Prezidente AD-SBL, Filomeno Pedro Cabral hato’o agradese tanba SLB harii hetan apoiu makas hosi Xanana inklui patrosinadór sira hotu.

AD-SLB ne’ebé funda hosi Xanana kompostu hosi Ekipa Selesaun Nasionál SLB U-14,U-15, U-18, Volley LSB feto-mane, Basket feto mane, Atletizmu feto-mane júnior no senior, Boxing SLB Júnior no Senior, no Asosiasaun Kultura Kay Rala  no oin sei harii tanba Klube SLB Badmintón, Tenis Meza, Motór Kross, no ekipa SLB Korrida Kuda nian no desportu seluk tan.

“AD-SLB nu’udar klube ida ne’ebé maka iha modalidade desportu barak liu iha Timor-Leste. Ami iha ekipa besik 200 liu,” dehan Filomeno.

Nia dehan, orsamentu ne’ebé KOICA fó sei uza harii estádiu ne’e para sai baze ba desportu Timor-Leste nian hodi prepara fini jogadór timoroan rasik.

Jornalista : Eugénio Pereira 

Editór       : Francisco Simões

HAKEREK NO HATÁN

Please enter your comment!
Please enter your name here