embru Juri Ba Kompetisaun Grupu Korál Múzika Rezisténsia, Domingos “Mitu” Freitas. Foto TATOLI: Cancio Ximenes

DILI, 05 agostu 2019 (TATOLI)—Membru Juri Ba Kompetisaun Grupu Korál Múzika Rezisténsia, Domingos “Mitu” Freitas, ohin, hateten nia hetan fiar husi Centro Nacional Chega! (CNC) hodi hala’o nia knaar atu halo aranjamentu ba múzika rezisténsia haat (4) inklui múzika obrigatóriu “Oras To’o Ona” ne’ebé hananu ba Konsulta Populár iha 1999.

“Ha’u hetan fiar husi CNC halo aranjamentu ba múzika haat (4). Ha’u, amu Aderito no maun Paulo, ami-na’in tolu fahe malu. Ha’u hetan fiar hodi halo aranjamentu ka halo notas ba múzika obrigatóriu ‘Oras To’o Ona’ ne’ebé uluk kanta ba Konsulta Populár,” dehan membru juri Ba Kompetisaun Grupu Korál Múzika Rezisténsia, Domingos “Mitu” Freitas, ba Ajénsia TATOLI liuhusi entrevista hafoin anunsia rezultadu eliminasaun iha Salaun Centro Convenção Dili (CCD), Merkadu Lama, Dili, segunda (5/9/2019).

Tanba halo aranjamentu ba múzika obrigatóriu, nia hatutan, tenke esforsu-aan hodi hasai ninia kreatividade no kapasidade oinsá atu halo aranjamentu ne’ebé difisil liu para bele halo kompetitor sira tenke fera-ulun atu aprende no hananu tuir.

“Ha’u halo aranjamentu ne’e tenke halo ida difisil liu para sira kanta karik fera-ulun oituan. Tanba difisil entaun ha’u  halo aranjamentu ba múzika ne’e to’o pjina hitu. Buat difisil liu ne’e mak monu iha oin nusa atu hatán malu, ninia ketukan ne’ebé la hanesan. Sopran tama hafoin alto no bass tama hanesan hodi halo harmomizasaun ba lian haat (Sopran, bass, tenor no alto) ne’e, korta malu ho ninia ketukan hotu tuir lian téknika múzika nian dehan ‘Kontrapun’ ne’ebé halo sira araska. Maibé tenke tama iha harmonizasaun múzika ne’ebé sólidu,” nia esplika.

Nia hatutan, durasaun halo aranjamentu ba múzika obrigatóriu refere, han tempu loron rua de’it. Tanba, nia halo aranjamentu ba dahuluk nia haree tiha notas, rona tiha lai nia audio no hakerek not angka (nota númerika). Hafoin ne’e, hahú fahe uluk not angka tuir ninia notas be difisil liu ramata ona mak muda fali ba programa civilius hafoin rona depois print out (imprime).

Tansá mak tenke halo aranjamentu ne’ebé defisil, nia hatán, lahatene maibé karik talentu ida ne’e Maromak mak haraik no fó. Nia lahatene maibé dalaruma nia hetan inspirasaun no motivasaun ida de’it mak tenke halo difisil liu no halo di’ak liu.

“Ha’u lahatene! Dalaruma ha’u hetan inspirasaun no motivasaun atu halo aranjamentu difisil liu no di’ak liu. Tanba, uluk iha eskola, ema hanorin ha’u siénsia harmonia oinsá atu harmoniza buat ida sai di’ak no furak. Ha’u tiding lian Sopran de’it, ha’u hatene ona. Atu hakaben lian haat ne’e fasil tanba ha’u toman no beibeik ona halo knaar ida ne’e, entaun ha’u sente fasil hela,” nia hateten.

Nia esplika, ema ne’ebé kanta múzika no halo aranjamentu ba múzika ruma tenke presiza imajinasaun tanba lian ne’e ita ema baibain labele kaer-toman. Lian ne’e laiha kór tanba lian ne’e só ita bele rona de’it no bele hipnota ema. Múzika ho lian di’ak bele halo ema tanis tanba lian ne’e úniku.

Entretantu, nia informa, aleinde halo aranjamentu ba múzika obrigatoriu “Oras To’o Ona” husi Kompozitór no Vocal Lahane Group, nia halo mós aranjamentu ba múzika tolu (3) seluk maka hanesan Liu Tinan Atus Haat (Kompozitor/Vocal; Bieki Sahe/Grupu do Cultural 28 Novembru/Fretilin), Tahu Tempe (Kompozitór/Vokál; Pedro Madeira/Pedro Madeira) no Noi Furak (Kompozitór/Vokál;  Agostinho Moniz/Agostinho Moniz).

Muzika haat (4) seluk, nia hatutan, ne’ebé Pe. Adérito Victor da Costa halo arajamentu mak múzika Lemorai (Kompozitór/Vocal; Vitorino C. S. Lemorai, Zeto da Costa/Amandio de Araujo), Ó Rai Timor (Kompozitór/Vokál; Nail), Tanba Riku Soin (Kompozitór/Vokál; Quito Belo/Gina Correia) no múzika Rai Timor Lorosa’e (Kompozitór/Vokál; Filipe Arranhado/Gina Correia).

Tanba, nia hatutan, sei iha múzika tolu ne’ebé restu entaun sira deside no konkorda hodi fahe múzika tolu (3) seluk ba membru juri Paulo Perreira atu halo aranjamentu. Múzika sira ne’ebé Paulo Perreira halo aranjamentu mak múzika Tansá La Dame (Kompozitór/Vokál; Chico Ramelau/Quito Sousa), Por Ti Timor (Kompozitór/Vokál; Nelson Turkel) no múzika Xanana (Kompozitór/Vokál; …?…/Tonny Perreira).

Notísia relevante:Kompetisaun Múzika Rezisténsia Hamoris Fali Patriotizmu No Nasionalizmu

Jornalista: Cancio Ximenes

Editór: Rafy Belo

HAKEREK NO HATÁN

Please enter your comment!
Please enter your name here