Doutór Andre Belo entrevista ho jornalista Ajénsia TATOLI. Foto TATOLI: Felicidade Ximenes

DILI, 06 agostu 2019 (TATOLI)—Diretór Organizasaun Naun-Governamentál, Saúde Ba Ema Hotu (SABEH), dr. Andrezinho Belo, hateten atu sai doutór tenke liuhusi estuda área saúde nian la’ós tuir de’it tuir treinamentu loron ida ka rua.

Tuir ema médiku nia koñesimentu, ema ne’ebé la’ós estuda ba área saúde mak halo atividade diagnóstika hodi identifika ema-nia moras, ema hirak ne’e tuir dalen Malaiu karik ita hanaran “ilmu bengkel” (siénsia ofisina nian).

“Ami médiku no doutór estuda to’o tinan neen ka hitu. Moras ida ne’ebé ita atu identifika liuhusi prosesu ezaminasaun lubuk ida mak foin hatene la’ós tuir treinamentu de’it bele deteta ona moras, ne’e bosok. Ema ne’ebé la’ós estuda ba  área saúde mak identifika  moras hirak ne’e,  lian Malaiu (Indonézia) karik hanaran ilmu bengkel, dehan Diretór SABEH, dr. Andre Belo, ba Ajénsia TATOLI iha nia kna’ar fatin, SABEH, Externato Manleu, Dili, tersa (6/8/2019)

Diretor SABEH hatutan, ilmu bengkel mós ema serbisu iha bengkel (ofisina) kle’ur mak hatene, la’ós tuir treinamentu de’it hatene ona deteta ema nia moras liuhusi teste saúde. Maibé, sira kria treinamentu ne’e oinsá atu halo promosaun ba ai-moruk herbal maibé treinamentu ida atu identifika ema-nia moras  ne’e la’ós fasil ida atu muda ita-nia hanoin maibé  tenke tuir  prosesu.

“Tanba moras sira ne’e nia efeitu barak la’ós uza de’it laptop mak identifika, la’ós teste saúde mak  identifika. Maibé, moras hirak ne’e tuir ami médiku nia hatene ne’e bosok de’it. Lalika fiar! Sé imi hakarak ba fa’an ai-moruk, fa’an de’it, la buat ida. Maibé, labele uza meiu sira hanesan ne’e atu habosok komunidade sira,” nia dehan.

Komunidade sira, nia haktuir, mak tenke matenek labele fiar demais ai-moruk herbal sira ne’e. Tanba sira tama sai-uma dehan médiku no enfermeiru hodi identifika moras maibé hatudu took kartaun enfermeiru ka lisensiatura nian husi área médiku husi ne’ebé no serbisu iha  saúde ne’ebé . Se laiha, lalika fiar. Tanba tuir ami médiku ne’ebé estuda tinan neen, buat sira ne’e bosok.

“Ami sempre hala’o tratamentu saúde ba komunidade sira iha área remota no ami hateten beibeik ba komunidade sira katak, ema ida ka rua mak mosu iha área rurál lori laptop, lori de’it teste saúde atu identifika moras hotu di’ak ne’e, laloos ida. Halo favór labele fiar sira,’’ doutór Andre esplika.

Nia haktuir, SABEH hanesan grupu voluntáriu ne’ebé kompostu husi médiku profisionál saúde hodi estabelese saúde ne’ebé di’ak no saudavel ba ema hotu. SABEH suporta nafatin dalan ne’ebé loos, dalan ne’ebé di’ak atu lori ema hotu- hotu ba moris saudavel no moris di’ak hodi la husik ema ida iha kotuk.

Notísia relevante: Membru K-Link La’ós Ema Saúde Maibé Hetan Kapasitasaun

Jornalista: Felicidade Ximenes

Editór      : Rafy Belo

1 KOMENTÁRIU

  1. dr. Andre toba mak mehi karik. se labarik ida te ben mak nia inan ho aman dehan labarik ne kabun moras. Ne sala ka los dr. Andre? Ka tenki presija doutor mak dehan kabun moras?

HAKEREK NO HATÁN

Please enter your comment!
Please enter your name here