Komisáriu Komisaun Funsaun Públika Asuntu Disiplinár, António Freitas

DILI, 6 agostu 2019 (TATOLI)—Ekipa Tranzisaun hosi Governu Sentrál kontinua hala’o serbisu ba segunda faze hodi fórmula dokumentu finál kona-ba avaliasaun ne’ebé diretamente hala’o iha Rejiaun Administrativa Espesiál Oé-Cusse Ambeno (RAEOA), semana kotuk.

Membru ekipa hosi Komisaun Funsaun Públika, António Freitas, hateten iha buat balun ne’ebé ekipa tenke hein liliu dokumentu balun.

“Dokumentu prinsipál balun ne’ebé ekipa tenke hein no ekipa rasik iha esperansa katak iha loron ida ka rua tan, Sekretáriu Rejionál sira bele entrega ona, nune’e ekipa bele fórmula dokumentu finál hodi entrega ba Primeru-Ministru,” António dehan ba Tatoli iha nia kna’ar fatin, ohin.

Kona-ba durasaun mandatu, António hateten, legálmente, hahú hosi despaixu ne’e públika iha Jornál Repúblika, iha sesta (2/8) to’o loron sanulu. Maibe, iha posibilidade bainhira iha prosesu formulasaun dokumentu ne’e seidauk kompletu ka dadus prinsipál balun seidauk kompletu, bele estende tan.

Oras ne’e, nia haktuir, ekipa simu ona dokumentu administrasaun, planu estratéjiku RAEOA ba tinan lima, mapa pesoál rekursu umanu, dadus projetu sira iha área agrikultura nian no dadus hosi área saúde nian, maibé agora falta dadus rua de’it mak autoridade seidauk entrega mak hanesan infraestrutura no finansa.

“Dokumentu rua ne’e hanesan dokumentu prinsipál ne’ebé ekipa tenke simu,” komisáriu ne’e subliña.

Nia informa mós katak ekipa haruka ona karta ofisiál ida ba Prezidente Autoridade Interinu, Arsénio Paixão Bano, atu téknikamente bele kompleta dokumentu prinsipál ne’ebé ekipa mensiona.

Bainhira to’o loron determinadu mak autoridade RAEOA la entrega, ekipa sei hakerek buat ne’ebé iha hodi relata ba Primeiru-Ministru.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here