Komemorasaun Loron Konsulta Populár ba dala-20 (30 agostu 1999-30 agostu 2019) iha Munisípiu Viqueque, Segunda (05/08/2019). Imajen/Nelson de Sousa

VIQUEQUE, 05 agostu 2019 (TATOLI)-Brigadeiru Jenerál FALINTIL-Forsa Defeza Timor Leste (F-FDTL), Falur Rate  Laek, apela ba timoroan hotu atu   fó valor ba rezultadu hosi  ukun rasik aan tanba sakrifika ona  ema barak nia mate.

Falur Rate Laek,  hato’o mensajen  ne’e, ohin, iha Munisípiu Viqueque, bainhira partisipa komemorasaun loron konsulta popular ba dala-20 (30 agostu 1999-30 agostu 2019)  no prezensa misaun INTERFET (The International Force East Timor) nian.  

“Produtu hosi funu revolta luta polítika asaun militár, manifestasaun pasifika,  torturasaun durante  okupasaun kolonializasaun to’o referendu 1999  tanba sakrifika ema wain nia ruin no ran  hodi sai aliserse ba nasaun ne’e, tanba ne’e, ita tenke valoriza,” afirma Brigadeiru Jenerál F-FDTL, Falur Rate Laek.

Brigadeiru Jenerál mós husu ba Governu atu kontinua rekolla restu mortais eroi sira ne’ebé to’o ohin loron seidauk hetan hodi halo’ot iha Jardim Eroi no seluk tan.

Iha okaziaun hanesan, Administradór Munisípiu Viqueque, Gregorio Henrique, iha ninia diskursu hatete, komemorasaun ne’e hodi re-lembra hikas akontesimentu importante iha pasadu tanba kontribui maka’as ba prosesu ukun rasik aan.

“Espesialmente ohin hala’o iha Viqueque ho komemorasaun ne’e hodi reflete fila fali ba akontesimentu istóriku sira  liuliu prosesu luta ba libertasaun nasionál hahú kedas 1975 to’o 1999,”afirma Administradór Munisípiu Viqueque ne’e.

Governu sentrál liuhosi komisaun organizadora ne’ebé lidera hosi Komandante ein-Xefe FALINTIL, Kay Rala Xanana Gusmão, aloka  ona orsamentu rihun $26  ba Autoridade Munisipál hodi ezekuta ba atividade festa konsulta popular ne’e. nune’e, Autoridade Munisípiu Viqueque kontinua aloka tan rihun $2 ba  Postu Administrativu haat hanesan Postu Administrativu Ossú, Uatulari, Uatucarbau no Viqueque Vila.

“Osan ne’e gastu ba programa hanesan kompetisaun pintura, poema, múzika rezisténsia, te’in hahán lokál ka tradisionál no desportu rekreátivu,” hateten Gregorio Henrique.

Serimónia komemorasaun iha Munisípiu Viqueque   partisipa mós hosi Ministru Transporte no Komunikasaun (MTK), José Agostinho da Silva, Brigadeiru Jenerál  F-FDTL, Falur Rate Laek no membru parlamentu nasionál sira, inklui povu Viqueque.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here