Xefe Estadu Maiór Jenerál FALINTIL-FDTL, Majór Jenerál Lere Anan Timur ho Komandante Jerál PNTL Komisáriu Polísia Faustino da Costa, akompaña hosi komandante sira hala’o konferénsia imprensa konjunta iha Kuartél Jerál PNTL, Caicoli, Dili, segunda (05/08/2019). Imajen/Eugénio Pereira

DILI, 05 agostu (TATOLI)-Komandu FALINTIL-Forsa Defeza Timor-Leste (F-FDTL) ho Polisia Nasionál Timor-Leste (PNTL), ohin, deklara, ofisiálmente hala’o operasaun konjunta hasoru grupu ilegál sira ne’ebé Estadu taka ona, maibé kontinua halo atividade sub-subar hodi hamosu violénsia no krime iha territóriu Timor-Leste.

Deklarasaun ne’e fó sai hosi Komandante Jerál PNTL Komisáriu Polísia Faustino da Costa ho Xefe Estadu Maiór Jenerál FALINTIL-FDTL, Majór Jenerál Lere Anan Timur, liuhosi konferénsia imprensa konjunta iha Kuartél Jerál PNTL, Caicoli, Dili.

Konferénsia imprensa ne’e mós akompaña hosi Xefe Inspesaun Jerál F-FDTL, Brigadeiru Jenerál, Cornélio Ximenes ‘Maunana’, Segundu Komandante Jerál PNTL, Komisáriu Polisia, Mateus Fernandes no komandante unidade PNTL ho F-FDTL sira.

Komandante Jerál PNTL Komisáriu Polísia Faustino da Costa, fó rajaun katak, operasaun konjunta ne’e hala’o tanba haree ba situasaun seguransa iha rai laran kontinua mosu krime ne’ebé envolve grupu ilegál sira.  Nune’e, bele asegura dame no hamatek ba povu no nasaun.

PNTL hala’o servisu tuir Konstituisaun artigu 147, katak, polisia ho forsa seguransa tenke defende legalidade demokrátika no garante seguransa interna ba sidadaun hotu no la inkilina ba partidu.  Prevensaun krime tenke bazeia ba respeitu direitu umanu. Lei maka determina regra no regulamentu  ba polisia no forsa seguransa no forsa sira seluk.

“Ita hotu akompaña ikus-ikus ne’e mosu akontesimentu barak iha rai laran no rai li’ur.  PNTL iha responsabilidade atu garante  hodi tau orden no seguransa hakmatek ba públiku no prevene  atu mosu krime ka hahalok ne’ebé kontra lei,” afirma Komisáriu Faustino da Costa.

Nia afirma tan, PNTL ho F-FDTL dedika aan tomak atu hametin no kumpre orden servisu hodi forma operasaun koordenada hodi hametin ambiente ida dame no hakmatek  iha territóriu TL hodi fó atensaun tomak ba grupu ilegál labele kontinua hamosu krime.

“La iha toleránsia ba kualkér krime ne’ebé akontese. Ba sidadaun sira, ami husu atu servisu hamutuk,” afirma Komisáriu Faustino da Costa.

Komandu rua hasai mós desizaun ida ba membru forsa rua, liu-liu PNTL atu halo atuasaun ba kualkér problema ho rigór no  defende de’it lei no sei la defende kualkér grupu ilegál.

Husu mós membru PNTL bainhira uza kilat no forsa atua situasaun tenke kontrola didi’ak.

“Bainhira uza arma ou kilat ho maneira ne’ebé obriga atu uza forsa kuandu la iha ligasaun ho atividade grupu ilegál sira,” nia tenik.

Xefe Estadu Maiór Jenerál FALINTIL-FDTL, Majór Jenerál Lere Anan Timur , aprofunda liu tan, diretiva operasaun ne’e hala’o hodi evita situasaun krime ne’ebé envolve hosi grupu ilegál sira labele kontinua akontese.

Lere Anan Timur apela ba joven hotu-hotu liu-liu grupu ilegál sira atu koopera no labele tenta halo krime hasoru forsa, tanba forsa rua sei uza arma estadu nian hodi tiru no defende aan.

Lere apela ba komandante PNTL no F-FDTL sira lalika ta’uk bainhira atua situasaun atu hetan dame, no kestaun violasaun direitu umanu tau lai ba kotuk para akalma situasaun hodi hetan dame iha povu nia leet.

“Komandante sira labele ta’uk kuandu defende interese nasaun ninian no interese povu nian. Uza forma hotu- hotu atu bele rezolve situasaun ida ne’e mak importante. Porké forsa kuandu sai ho kilat ne’e bolu regra empeñamentu, no bainhira maka bele tiru mate no bainhira mak labele tiru mate, ne’e regra iha. Komandante sira iha ne’e lalika  ta’uk, imi atua, mak ami ba responsabiliza, mais primeiru imi responsabiliza ba ami, depois mak ami responsabiliza ba justisa,” Lere Anan Timur apela.

Lere apela mós grupu ilegál sira tuur hamatek no labele treinu subar iha uma ka bairru,  tanba forsa rua nia ekipa intelijénsia koopera ho autoridade lokál inklui autoridade juventude sira hodi garantia seguransa hodi hakmatek iha bairru hotu- hotu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here