KAK Aprezenta Programa Tinan Lima ba Xefe Estadu

DILI,  5 agostu 2019 (TATOLI)—Komisáriu Komisaun Antí Korrupsaun (KAK) na’in haat lidera hosi Komisáriu Sérgio Hornai, aprezenta programa tinan lima luta kontra Korrupsaun ba Prezidente Repúblika (PR), Francisco Guterres Lú Olo, ohin, iha Palásiu Prezidente Nicolau Lobato, Bairru Pité.

Hafoin aprezentasaun, Komisáriu Sérgio Hornai hateten programa ba tinan lima ne’e sai hanesan preokupasaun estadu tomak ba luta kontra korrupsaun iha nasaun ne’e. Ho ida ne’e mak KAK husu apoiu polítika hosi Xefe Estadu iha luta hamutuk ne’ebé di’ak liu no efikáz.

Durante hasoru malu ne’e mós Komisáriu sira introdúz kona-ba estrutura terseiru mandatu  komisáriu sira nian,  planu prioridade, planu estratéjiku periudu 2021-2025,  inklui polítika nasionál prevensaun no kombate krime korrupsaun iha Timor-Leste.

Kona-ba kestaun ne’e, Sérgio haktuir Prezidente Repúblika apresia tebes ba serbisu instituisaun estadu espesiálmente Komisaun Antí Korrupsaun, oinsá serbisu hamutuk no metin liu-tan ho Prokuradoria Jerál Repúblika,  serbisu hamutuk ho organizasaun krimrinál sira,  atu alkansa objetivu katak  estadu iha integridade.

Kona-ba preokupasaun públiku ne’ebé konsidera KAK hala’o mós serbisu polísia, Sérgio hatán,  ida ne’e halo ekipa KAK forsa liu-tan atu hala’o serbisu di’ak liu-tan.

Aleinde ne’e,  Sérgio hakarak artikula  liliu kona-ba lei nú. 8/2009,  ne’ebé foka kona-ba  Komisaun Antí Korrupsaun nu’udar órgaun polisiál espesialidade ida,  atu hala’o serbisu ba área kombate korrupsaun, inklui krimi koneksu sira seluk.

Hornai informa mós katak durante ne’e KAK rekomenda ona ba Ministériu Públiku kazu 60 resin, hanesan kazu krime abuzu podér,  krimi korrupsaun ativu, krimi pekulatu uzu no seluk-tan.

Durante hasoru malu ho Xefe Estadu,  Sérgio Hornai akompañadu hosi Komisáriu Adjuntu ba Prevensaun no Sensibilizasaun, Luís Sampaio Oliveira, Komisáriu Adjuntu ba Asuntu Investigasaun, Augusto Castro, Komisáriu Adjuntu ba Asuntu Apoiu Kooperasaun, Alexandre Freitas.

Komisáriu Sérgio Hornai simu pose lidera KAK iha 21 janeiru 2019 no Komisáriu Adjuntu na’in tolu simu pose iha 21 juñu 2019.

Lee mós: Sergio Hornay Eleitu Nu’udar Komisáriu KAK

Jornalista: Cipriano Colo

Editór: Xisto Freitas