irmán na’in haat ne’ebé simu Primeira Profisaun. Foto TATOLI: Cancio Ximenes

DILI, 05 agostu 2019 (TATOLI)—Reprezentante Padre Provinsiál Salesiano Dom Bosco Timor-Leste, Pe. Ilídio Correia, SDB, hateten loron ida ne’e loron ksolok hodi selebra, fó agradese no fó apoiu ba Irmán na’in haat ne’ebé ho aten brani hatán “sim!” ba Na’i Nia bolu hodi simu primeira profisaun.

“Ha’u dehan, maske sira sei hatán ba tinan ida maibé intensaun forever ka nafatin ba nafatin. Ha’u espera katak imi na’in haat nafatin mantein ida ne’e. La’ós sementara (provizória) maibé ba oin nafatin moris iha pobreza, kastidade no obediénsia. Ne’e duni, ‘sim!’ ne’ebé permanente, ba nafatin,” dehan Reprezentante Padre Provinsiál, Pe. Ilidio Correia, SDB, iha ninia omilia iha misa eukaristia primeira profisaun ba irmán na’in haat ne’ebé hili lema “Na’i Tan Ita Mak Dehan Ha’u Sei Soe Dai” (Lk 5,5) iha Kapela Maria Auxiliadora, Comoro, Dili, Segunda (05/08/2019).

Ba família sira, amu hatutan, dala barak madre ka irmán sira halo votus, família balun komentáriu husi kotu-kotuk katak sira lakon rikusoin tanba nia oan sira hatán ‘sim!’ ba Na’i nia bolu. Maun alin sira, loloos família la lakon buat ida maibé família sira manan hodi entrega nia oan sira serbisu iha Maromak Nia to’os liuhusi Instituto Filhas de Maria Auxiliadora (FMA) nian.

Nia esplika, ba madre no padre sira, ohin loron ema kestiona barak tanbasá mak imi tenke husik buat hotu-hotu. Tanbasá mak tenke tuir dalan kalvariu nian no tanbasá mak tenke hatán ‘sim!’ ba Maromak. Ita la haree katak ohin dehan ‘sim!’ no aban dehan ‘lae!”.

“Ha’u haree, agora ne’e mudansa rápidu tebe-tebes. Ema-nia ‘sim!’ ba Na’i nia bolu agora ne’e hanesan Xinxiang (Xina) nia sasán. La dura. Tanbasá mak imi kole-kole ba hatán ‘sim!’ permanente jura ba nafatin. Sadik ida mai ita. Mudansa rápidu. Na’in madre na’in haat, ne’e iha konsekuénsia ba ita sira ne’ebé ‘yes’ ba Maromak,” nia fó hanoin.

Maske nune’e, nia hateten, dala ida tan imi ho aten-brani oferese imi-nia aan ba Maromak. Imi keta ta’uk tanba fiar katak ita mesak labele no ita mesak de’it nia kbiit la to’o. Ita tenke tau ita-nia konfiansa, hanesan Na’i Feto, iha Maromak Nia Domin no iha Maromak Nia Grasa. Maromak mak hahú, Maromak mak sei tane no lori to’o rohan.

Atu tuir dalan ida ne’e, nia hateten, sei iha dezafiu barak no dalan ba Kalvariu ne’e naruk. Iha ai-krús dalaruma kmaan no dalaruma todan. Maromak bolu, Maromak mós fó kbiit atu lori ita-nia krús. Husi primeira leitura ho evanjellu ko’alia mai ita atu ‘keta ta’uk!’. Iha primeira leitura, Jeremias sente-aan hanesan labarik ida ne’ebé nurak maibé Maromak fó kna’ar ida ne’e ba nia no dehan ba nia ‘keta ta’uk!’.

“Madre sira no irmán sira ne’ebé atu simu votus, Jesus mós dehan mai ita ‘keta ta’uk!’. Ita simu knaar ida ne’e atu kontinua Jesus nia misaun atu sai tiha na’in ema-nian. Liafuan ida ba irmán na’in haat, ba ita hotu-hotu mós, ita-boot sira halo reflesaun antes to’o loron ohin, karik husu ba aan rasik, ha’u ne’e soi no prontu duni atu simu vokasaun ne’e ka lae atu hahú dalan ida ne’e. Se ita-boot sira hatán “sim!” tanba ita-boot sira kolabora atu simu proposta hanesan Na’in Feto fiar,” amu hateten.

Vokasaun, tuir amu Ilídio esplika, mak dom ida Maromak nian atu ita hakbesik liután ita-aan ba Nia. Nia mak fó, Nia hatene katak ita mós bele. Tanba ne’e, Nia fó knaar ida ne’e mai ita. Ne’e duni, Jesus Kristu mak ita-nia motivasaun no ita-nia objetivu ikus.

Ne’e duni irmán sira, loron ba loron iha ita-nia moris iha vokasaun ida ne’e sempre nafatin tau Jesus Kristu iha sentru. Lahó Jesus, ita labele buat ida, ita la ba dook, lahó Jesus ita-nia moris vokasaun frajil, abut laek no kulapur lalais. Atu metin no atu sai besi-asu, tenke besik ba Nai Jesus. Ne’e duni irmán sira, ho ksolok no aten brani ba oin.

“Ne’e duni, ita repete fali São Pedro ninia karta (segunda leitura) hateten; Ne’e duni maun-alin sira, laran manas liután atu hametin buat ne’ebé imi simu tiha, katak Maromak bolu no fihir imi. Basá, imi halo ida ne’e karik, imi sei la monu. Nune’e, ho kmanek ua’in, imi bele tama iha ita Na’i no Maksoin, Jesus Kristu, nia reinu rohan laek,” amu Ilídio haktuir.

Hafoin simu primeira profisaun, Madre Provinsiál Salesiana ba Timor-Leste no Indonézia, Me. Alma Castagna, FMA, fó kna’ar ba irmán na’in haat ne’ebé hatán “sim!” ba Na’i nia bolu hodi hala’o knaar iha Komunidade Salesiana sira iha Timor-Leste.

Ir. Domingas da Silva hala’o knaar iha Komunidade Maria Auxiliadora Venilale-Baucau, Ir. Ingracia Sarmento Afonso Gama ba Komunidade Fuiloro-Lospalos, Ir. Sidonia Paula Freitas ba Komunidade Beata Romero Cailaco-Maliana no Ir. Teresa Correia de Carvalho ba Komunidade Beata Eusébia Palomino Comoro-Dili.

Jornalista: Cancio Ximenes

Editór     : Rafy Belo

HAKEREK NO HATÁN

Please enter your comment!
Please enter your name here