Logo FONGTIL

DILI, 05 agostu 2019 (TATOLI)-FONGTIL (Forum ONG Timor-Leste) hamutuk ho nia membru tomak kongratula serbisu ne’ebé ekipa Delegasaun Delimitasaun Fronteira Marítima halo ho Espiritu Nasionálizmu no Patriotizmu hodi luta hasoru Governu no Estadu Imperialista boot hanesan Austrália hodi bele tur iha meza hodi ko’alia kona-ba definisaun baliza tasi ho Timor-Leste.

“Iha momentu oportunu ne’e mós ami hakarak fó parabéns ba povu no estadu Timor-Leste ba vitória ida ne’ebé maka Timor-Leste hetan ona nia Fronteira Tasi hodi kompleta soberania Timor-Leste liuhosi fronteira definitivamente ho Governu Austrália ne’ebé maka sei troka nota ratifikasaun iha loron 30 Agostu 2019,” refere komunikadu imprensa FONGTIL ba TATOLI, segunda (05/08/2019).

Iha komunikadu ne´e, FONGTIL haktuir, sira hakerek no ko’alia liuhosi sirania submisaun sira ne’ebé sira hato’o ba Parlamentu Nasionál no fahe públiku kona-ba sira-nia preokupasaun, liga ho proposta alterasaun Lei Fundu Petróleu no Lei Atividade Petrolíferu.  “Ami preokupa alterasaun ida ne’e liuliu kona-ba Artigu 15+ A proposta Alterasaun Lei Fundu Petrolíferu ne’ebé permite Fundu Petrolíferu atu uza iha operasaun petrolíferu”.

FONGTIL, liuhusi komunikadu ne´e konsidera alterasaun ida ne’e prejudika ba sustentabilidade hosi Fundu Petrolíferu tanba investimentu ne’ebé maka halo liuhusi instrumentu dívida privadu ba operasaun petrolíferu liuhosi empreza públiku hanesan Timor-Gap sei la garantia re-embolsu no retornu ba Fundu Petrolíferu. Investimentu konsentradu iha setór petróleu sei prejudika no abandona setór sosiál no ekonómiku.

“Ho razaun ida ne’e ami sosiedade sivíl Timor-Leste ho respeitu husu Sua- Exelénsia Prezidente Repúblika atu veta Proposta Alterasaun ba Lei Fundu Petróliferu no Lei Atividade Petróliferu”.

“Liuhusi komunikadu imprensa ida ne’e ami husu ba Sua-Exelénsia Prezidente da Repúblika atu promulga ka haruka publika rezolusaun Parlamentu Nasionál kona-ba ratifikasaun Fronteira Marítima,” husu tan FONGTIL.

Notísia relevante:C12N Kongratula Kay Rala Xanana Gusmão

Jornalista: Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here