Bispu Dioseze Baucau, Mgr. Basilio do Nascimento. Imajen/Nelson de Sousa

BAUCAU, 05 agostu 2019 (TATOLI)-Bispu Dioseze Baucau, Mgr. Basilio do Nascimento, husu ba ukun na’in no polítiku sira atu la bele la’o ida-idak nian, maibé tuur hamutuk kultiva domin ba interese nasaun nian mak boot liu.

Notísia Relevante :  Baucau Komemora Loron Konsulta Populár

Bispu Basilio do Nascimento hateten lia hirak ne’e hodi responde Ajénsia TATOLI, kona-ba reflesaun komemorasaun loron konsulta popular ba dala-20 (30 agostu 1999-30 agostu 2019) iha  Igreja Vila Nova, Baucau, domingu (04/08/2019).

Dom Basilio hateten, komemorasaun loron  konsulta popular  sai hanesan reflesaun hodi hateke ba oin, atu kultiva ho domin  ba interese nasaun mak boot liu.

“Ha’u nia mensajen mak ne’e, liuliu ba ukun na’in no polítiku sira, labele la’o ida-idak nian. Buka atu tur hamutuk  kultiva domin ba interese nasaun nian mak boot liu hotu,” hateten Dom Basilio.

Amu Basilio fó sasin katak, loron 30 agostu 1999 ba kotuk sai sasukat ida ba timoroan hotu hodi haree atu to’o iha ne’e, ran hira mak fakar no vida hira mak lakon.

“Agora ba oin, ne’e halo ita nia nasaun independente, maibé independente mós tenke iha realidade tanba buat lubuk ohin loron akontese hela ne’e halo ita nia indesénsia kudik uitoan,” tenik Dom Basilio do Nascimento.

“Ha’u hanoin buat sira hotu ona iha 30 agostu 1999 liu ba, maibé agora nasaun timor mak independente liu ne’e duni horibainhira ida-idak buka nia dalan oinsá mak liberta aan  hosi indonézia.”

Nia afirma katak, Timor-Leste atu sai independente presiza timoroan hotu nia kolaborasaun no kontribuisaun. Ne’e duni, buat ida egoízmu, auto-kontemplasaun, narsizizmu katak haree de’it ba nia aan ba lalenok ha’u mak boot liu.

“Kuandu ita haree nasaun nia interese ne’e narsizizmu ita kultiva de’it egoízmu, ita la kultiva interese nasaun nian,” afirma Dom Basilio.

Nia husu iha komemorasaun loron konsulta popular atu haree ba oin no hotu-hotu hamutuk hodi dezenvolve interese nasaun mak boot liu. Tanba  tuir Amu Basilio, rai ki’ikoan ne’e ema hakarak hadau malu hela iha timoroan nia leten tanba riku.

Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here