Delegasaun Kongresu Amerikanu hasoru malu ho Primeiru Ministru Taur Matan Ruak. Foto: Embaixada EUA

DILI, 05 agostu (TATOLI)-Lider Delegasaun Kongresista Amerikanu, David Price husi North Carolina hateten katak impresionadu ho progresu Timor-Leste tanba konsidera Timor-Leste halo ona progresu boot hodi rekupera husi konflitu no kria demokrasia ida ne’ebé ho dame.

“Ami-nia membru delegasaun hotu espera atu kontinua aprende husi timoroan sira no serbisu hamutuk atu dezenvolve demokrasia no instituisaun ne’ebé inkluzivu ne’ebé reprezenta timoroan hotu,” hateten Lider Delegasaun, David Price liuhusi komunikadu imprensa TATOLI asesu husi Embaixada Estadus Unidu, segunda (05/08/2019).

Embaixadora Kathleen Fitzpatrick ho nia ekipa iha Embaixada EUA agradese Parlamentu Nasionál, Governu no timoroan hotu ba simu vizita importante ida ne’e. “Ami onradu hodi simu vizita delegasaun importante ida ne’e mai Timor-Leste. Vizita ida ne’e re-afirma relasaun forte entre Estadus Unidus no Timor-Leste, nasaun rua ne’ebé kompartilla valór sira demokrasia nian no serbisu hamutuk atu apoia pás iha rejiaun Indo-Pasífiku bazeia ba solusaun dame ba disputa sira tuir lei internasionál”.

 Iha komunikadu ne’e mós diplomata amerikana ho nia ekipa iha EUA hateten katak sente onradu ba delegasaun ida ne’e tanba konsidera delegasaun ne’e sei hasoru malu ho Prezidente Repúblika, Prezidente Parlamentu Nasionál, Primeiru Ministru, Vise Prezidente Parlamentu Nasionál, Xefe Bankada Parlamentár no Grupu Feto Parlamentár. Delegasaun Kongresionál mós hasoru malu ho lider polítiku feto no emprezáriu sira, lider joven no sosiedade sívil sira.

“Ami hato’o agradesimentu espesiál ba benvindu murak husi Sua Exelénsia Xanana Gusmão ne’ebé oferese jantar furak ida ba delegasaun hafoin sira to’o iha loron 28 Jullu,” nia agradese.

Dezde 2009, Programa House Democracy Partnership apoia ona Parlamentu Timor-Leste nia servisu peskiza, apoiu fundu ba harii biblioteka, integrasaun informasaun no teknolojia ba operasaun parlamentu nian no insentiva supervizaun parlamentár ne’ebé efisiente.

Entretantu, Delegasaun Kongresista Amerikanu na’in hitu husi Kámara Reprezentante Estadus Unidus Amérika (EUA) vizita Timor-Leste husi loron 28 to’o 30 vizita ne’e nu’udar parte ida husi kooperasaun atuál programa House Democracy Partnership ne’ebé ho nia ho objetivu atu hametin instituisaun demokrátika sira iha EUA no Timor-Leste.

Vizita ida ne’e hanesan vizita ba dalimak delegasaun kongresu EUA nian mai Timor-Leste liuhusi programa the House Democracy Partnership.

Jornalista        : Nelia Fernandes

Editór              : Rafy Belo

HAKEREK NO HATÁN

Please enter your comment!
Please enter your name here