Konvíviu Populár iha sede Komité Sentrál FRETILIN (CCF-sigla portugés), ohin kalan. Konvíviu refere organiza hosi Juventude FRETILIN. Imajen TATOLI/Evaristo Soares Martins

DILI, 3 agostu 2019 (TATOLI) – Sekretáriu Jerál FRETILIN, Marí Alkatiri, hateten timoroan hotu terus durante tinan 24 nia laran no konsege liberta pátria maibé povu seidauk libertadu hosi ki’ak no mukit, tanba ne’e povu presiza moris ho dignidade.

“Liberta povu atu lori dezenvolvimentu mai Timor-Leste, atu ema idak-idak moris ho dignidade. Moris dignidade ne’e signifika tenke kore-aan hosi dependénsia. Ema ida labele depende ba ema seluk, maibé tenke depende ba nia-aan rasik ho nia kbiit rasik”, tenik Alkatiri bainhira hala’o konvíviu populár ho tema “Consolidar a FRETILIN Para Melhorar o Estadu”, iha Sede Comité Central FRETILIN (CCF), Comoro, sábadu ne’e.

Tuir nia, partidu ne’ebé kaer ukun presiza investe barak iha área importante sira ba povu nia moris diak.

“Investe iha edukasaun, saúde, agrikultura no investe iha ekonomia diversifikada. Ne’e la akontese to’o agora”, nia subliña.

Eis Primeiru-Ministru ne’e observa, dezde tinan 2007 to’o agora gasta ona billiaun $12, maibé partidu sira ne’ebé kaer ukun la konsistente ba sira-nia polítika no programa.

“Hahú hosi 2007 to’o agora, promesa hela de’it, susar implementa”, nia akresenta.

Alkatiri konsidera, ukun ho konsiénsia ne’e katak bainhira foin harii Estadu Direitu Demokrátiku ida, atu bele loke dalan para hamoris nasaun ida ne’ebé forte no unida no ukun ne’e tenke buka uluk autonomia iha ekonomia.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here