Prezidente Klube SLB, Kay Rala Xanana Gusmão ho Sekretáriu Estadu Juventude no Desportu (SEJD), Nelio Isaac Sarmento, hasai fotografia ho ekipa U-18 iha Rezidénsia Lesidere, Dili, sesta (03/08/2019). Imajen/Eugénio Pereira

DILI, 03 agostu (TATOLI)-  Prezidente Klube SLB, Kay Rala Xanana Gusmão, husu ba ekipa Selesaun Nasionál U-18  tenke unidade no hatudu disiplina hodi lori ekipa hetan vitória iha jogu Taxa ASEAN Football Federation (AFF) 2019 iha Myanmar.

Prezidente Klube SLB, Kay Rala Xanana Gusmão konversa ho Jogadór ekipa nasionál U-18 Kay Olo Gusmão, Sesta (03/08). Imajen/Eugénio Pereira.

“Importante liubá imi maka tenke jogu ho unidade, la’ós kestaun imi atu manan ou lakon, maibé bainhira imi jogu ho ekipa unidade no disiplina makas, maka imi fila mai sei lori vitória no ami hotu sei ba simu imi iha aeroportu ho orgullu,” hateten Xanana, ohin,  bainhira hamutuk ho Sekretáriu Estadu Juventude no Desportu (SEJD), Nelio Isaac Sarmento despede ho jogadór U-18 iha Lecidere, Dili.

Ekipa U-18 kompostu hosi jogadór na’in 30 liu, inklui Treinadór, Andi Susanto no Asistente Mohamad Nico, ohin, arranka ona ba Myanmar hodi reprezenta Timor-Leste iha jogu taxa AFF 2019.

Tuir oráriu ne’ebé fó sai ona Timor-Leste monu iha Grupu A hamutuk ho ekipa Indonézia, Myanmar, Laos, Filipina, Brunei Darussalam.

Timor-Leste iha jogu dahuluk sei kontra Brunei Darussalam iha loron 5 agosto, hasoru Indonézia iha 7 agostu, Myanmar iha 9 agostu, Filipina iha 11 agostu no hasoru Laos iha loron 13 agostu.

Xanana husu ba ekipa U-18 hatudu disiplina makas durante jogu, atu ne’e jogadór sira bele hetan prestasaun di’ak no aprende esperiénsia barak hasoru jogadór di’ak hosi nasaun belun ASEAN sira.

“Imi hanesan embaixadór para ba hamorin ita nia nasaun iha ema nia rain para ema haree Timor-Leste ne’e, sira dehan waooo….waooo. Ita mós bele,” tenik Xanana.

Iha fatin hanesan, Sekretáriu Estadu Nelio Isaac Sarmento, mós hato’o mensajen ba jogadór sira atu kumpre kualkér regra durante jogu too remata.

 Nelio dehan, SEJD iha responsabilidade boot kontinua suporta no akompaña ekipa bele fó susesu pozitivu iha jogu.

Entretantu, Jogadór U-18 Kornelis Pirtela ho Kay Olo Gusmão promote sei lori U-18 tama iha meius final.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here