Padre Angelo Eduardo Jeronimo Moreira, SDB. Imajen/Nelson de Sousa

BAUCAU, 03 agostu 2019 (TATOLI)-Selebrasaun loron konsulta popular (Referendu) ba dala-20 (30 agostu 1999-30 agostu 2019) no loron Misaun INTERFET (International Force East Timor) ne’ebé hala’o iha Baucau ba loron daruak nian, ohin, hahú ho misa agradesimentu iha Igreja Katedrál Baucau.

Sarani Baucau paritisipa misa agradesimentu ba loron konsulta populár ba dala-20 iha Igreja Katedrál Baucau, Sábadu (03/08/2019). Imajen/Nelson de Sousa

Misa solene ne’ebé prezide hosi Padre Angelo Eduardo Jeronimo Moreira, SDB, partisipa hosi veteranu, autoridade sivíl no militár Munisípiu Baucau, juventude, estudante no reprezentante hosi postu administrativu sira ne’ebé pertense ba Munisípiu Baucau.

Iha nia omilia, Padre Angelo Eduardo Jeronimo Moreira, SDB, hateten, tinan 20 liu ba (30 agostu 1999) nu’udar  povu doben Timor-Leste marka pontu final ba kapítulu ida ne’ebé moruk tebe-tebes iha nia istória.

Saserdote  hosi Uma Kreda Diocese Baucau nian ne’e fó sasin katak, povu ida ne’e uitoan de’it, simples no moris iha presaun polítiku nia laran hosi 1975-1999, maibé demonstrasaun sira konsiénsia demokrasia nian hodi hakat ba fatin votasaun hili ou vota ba CNRT (Conselho Nacional de Resistência Timorense) hodi termina rai ne’e nia destinu.

“Pergunta ida mosu mai tansá mak mezmu ho intimidasaun, violénsia oi-oin, maibé povu la ta’uk hodi ba ezerse sira nia votu,” hateten Amu Lulik hosi Kongregasaun Salezianu ne’e nu’udar reflesaun ida atu hothotu hanoin hamutuk.

Nia mós fó sasin katak, dezde invazaun Indonézia nian mai Timor-Leste hosi loron 7 Dezembru 1975 to’o 1999, povu Timor-Leste liu rihun atus rua mak mate hodi soi rai ida ne’e nia independénsia.

Nia hateten, masakre barak iha Timor laran, hanesan Kararas, 12 Novembru (Santa Cruz), Masakre Igreja Suai, Masakre Tumin, Oe-Cusse. Masakre seluk tan hatudu ba mundu no ba Timoroan hotu nia futar matan katak rai ida ne’e sai nasaun la’ós simu hosi bandeja,  maibé ho sakrifisiu no mate nia leten.

Iha oportunidade ne’e, prezidente Autoridade Munisípiu Baucau, António Augusto Guterres, hateten, liuhosi misa  agradesimentu ne’e dedika ba eroi hotu ne’ebé fó ona nia kontribuisaun  ba rai ida ne’e hodi hetan ukun aan.

Povu Baucau lori ai-funan ba Osóraiu Fatumaca hodi kari ai-funan ba eroi sira ne’ebé mate ba ukun rasik aan, Sábadu (03/08/2019). Imajen/Nelson de Sousa

Hafoin misa, povu Baucau halo prosesaun ho karreta ba kari ai-funan iha  Osóariu Fatumaca.

Partisipa iha mós iha misa no serimónia kari ai-funan ne’e, Vise Ministra Saúde Primária, Élia A.A. dos Reis Amaral, membru Parlamentu Nasionál, Prezidente Autoridade Munisípiu Baucau, António Augusto Guterres, Komandante PNTL Baucau, Superintendente Xefe Hermenegildo Gonçalves, Prezidente Konsellu Imprensa (CI-sigla Portugés), Virgilio da Silva Guterres, veteranu, estudante, no komunidade sira.

 Jornalista          : Nelson de Sousa

Editór                : Francisco Simões

HAKEREK NO HATÁN

Please enter your comment!
Please enter your name here